RoundGlass lakah Aizawl FC an vanduai

Aizawl FC-in Thawhṭanni zan khan RoundGlass Punjab an tlawh a, 2-1 in an chak lo. Tau Devi Lal Football Stadium-ah Punjab tan Luka Majcen leh Deepak Devrani ten an khung a, Aizawl FC tan R. Lalthanmawia'n khung bawk mah se hun tawp dawn hnaiha captain Lalchhawnkima'n penalty a hlah avangin point an hlawh chhuak zo lo.

Aizawl FC hian December 2, Zirtawpni hian Churchill Brothers an tlawh ang a, December 8, Ningani hian RG Stadium-ah Neroca an mikhual ang. Mizo club hian Standly Rozario awm loh hnuah match hnih an khel a, an chak lo ve ve. Aizawl FC hian MPL-ah FC Venghnuai an hneh loh avangin champion nomawi an hum thei dawn lo a, I League-ah pawh match li khelh tawh aṭangin point li chiah an la hmu a ni.

Majcen leh Amawia
RounndGlass tan Mizo tlangval Daniel Lalhlimpuia, Samuel Lalmuanpuia, Brandon Vanlalremdika leh Freddy Lallawmawma ten bul an ṭan a, mualneitu hian bul an ṭan ṭha hle. Punjab striker Luka Majcen chuan Chhawnkima lakah penalty a hlawh chhuak a, a penalty hmuh hi keeper Vikram Singh bum nan hmangin minute 16-naah goal hmahruai a khung.

Mizo club an insiamrem a, Inter Village 2022-a Champhai Kanan champion puitu R. Ramdinthara cross ṭha chu R. Lalthanmawia'n minute 27-naah a khung a, 1-1 a ni. Team pahnihin goal khung belhna chance an nei ve ve a, Punjab lamin goal ban tihper mah se first half-ah goal dang hmuh tur a awm tawh lo.

Penalty hlah
First half ang thoin second half ṭantirhah Punjab an che ṭha a, Luka Majcen-a'n goal khung belhna remchang nei mah se goal zawnah a pet lo. Hunthar tlangval Brandon pawhin Aizawl FC tlarhnung a rum ṭhaih a, keeper Vikram-a'n a goal khung tur a dansak.

Minute 78-naah Punjab-in corner kick an hmang ṭangkai a, corner aṭanga ball kal chu Deepak Devrani-a'n goa-ah a chantir. Goal chhuah hnuah Aizawl FC-in risk an la a, an goal bawh a na sawt. Argentine midfielder Matias Veron chuan Punjab keeper pet khum mah se goalline aṭangin Devrani-a'n a pet chhuak.

Hun tawp hma deuhin Chhantea Sailo chu box chhungah an titlu a, referee Tanmoy Dhar-a'n khelh chhunzawm tir se Amawia'n a goal hnihna a khung ang. Amaherawhchu referee hian a ham hman avangin Mizo club hi penalty pek an ni a, Chhawnkima rawn pen chhuakin MPL9-a goal nga khungtu player hian keeper bum mah se crossbar a pet per. Mizo club-in an hun ṭha an bawhpelh avangin 2-1 in an chak lo.