Champion tum Brazil-in last 16 an lut

Brazil-in an thiampuipa Neymar chhawr thei lo mah se Switzerland lakah hnehna an chang ta tho a, Thawhṭanni zan khan World Cup last 16 lut turin Swiss team hi 1-0 in an hneh.

Tlarhma neih ṭhat avanga team tam zawkin tum an châk loh Brazil tana goal awmchhun khungtu erawh Casemiro a ni a, Manchester United defensive midfielder goal khung hi goal mawi bik a ni.

Brazil-in match hnih aṭangin point ruk an nei ta der a, an match hnuhnung berah Cameroon laka point an hlawh chhuak a nih chuan table chung ber luah chungin knockout round hi an lut ang.

Stadium 974, Doha-a inkhel hi Brazil legend Ronaldo, Kaka, Roberto Carlos leh Cafu te chuan a hmunah an en a, Casemiro goal khung vanga an hlim hmel television-a lo lang chuan mi tam tak lung a tileng ang.

A harsa
Brazil-in Serbia laka hliam avangin Neymar chu group stage-ah an chhawr thei tawh dawn lo a, mahse, he team hian tlarhmaah Vinicius Jr, Raphinha leh Richarlison te ho an la neih avangin lungngaihna tur awm lo tura ngaih a ni.

Mahse, match hmasa bera Cameroon hnehtu Switzerland an ṭha ve tho a, top team ema chhiar ngam ni lo mah se Brazil laka result danglam thlen turin an ṭha tawk - an goal pawh an venghim rei hle.

Selecao hian an shot hmasa ber nei turin minute 27 an nghah a ngai a, Vinicius Jr-a shot chu Swiss keeper

Yann Sommer chuan ṭha zetin a dang a, Raphinha hun ṭha neih pawh Borussia Mönchengladbach keeper hian a dansak.

Neymar tel loin Brazil-in tlarhma an nei ṭha tawkah ngaih ni mah se, Paris Saint-Germain forward tel loin an goal nawr a na tawk lo a, Swiss tlarhnung an khel ṭha hrim hrim bawk.

A hunah Casemiro
Brazil tlarhma an hriam tawk lo a, goal an khung hleithei lo. Coach Tite pawhin an game thlak danglam tumin Rodrygo, Bruno Guimarães, Antony leh Gabriel Jesus te ho a luhtir a, Swiss player ni se bul ṭan thei ṭhiau tur an ni - hei hian team pahnih inthlauhna a hrilhfiah.

Mahse, Tite-a'n goal beiseia player a thlak kual chungin, a tawpa chhanna petu chu defensive midfielder Casemiro a ni - kum 30 mi midfielder hian Rodrygo siamsak chu mawi zetin a hlap lut a, Sommer tan tih theih a awm lo.

Brazil-in goal an khung hian minute 83-na a ni tawh a, draw result hlawhchhuah tum Switzerland-in tlarhnung veng reng thei an ni lo tih inhriain an nawr let a, mahse, hei hian Brazil tan hmun awl a siamsak.

Selecao tan hian Guimaraes-a ball tauh chu Sommer chuan a dansak a, Rodrygo khung ngei tura ngaih Manchester City defender Manuel Akanji-a'n a lo dan hman pawh a ṭha takzet - hun tawp thlengin goal dang a lut lo a, Brazil an chak.

Casemiro an fak
Neymar-a'n ke rek hliam vangin a ṭhiante a zawm thei lo a, tun World Cup-a a inlan leh dawn chuan knockout round an luh a ngai - Casemiro-a'n chakna goal khungin last 16 an lut a, Neymar a hlim hle.

Brazilian forward hian inkhelh zawhah, "Rei tak chu Casemiro hi khawvela midfielder ṭha ber a ni tawh," tiin twitter lamah a ziak a, Brazil coach Tite chuan, "Mi ngaihdan ka zahsak ṭhin a, an thusawi lo sawi chhawn ve hi ṭul ka ti lo. Mahse, vawiinah chuan Neymar-a thusawi ka pawmpui thu ka sawi duh," a ti!

Casemiro chuan, "Goal ka khung ngei a, mahse, team pumpui ṭanpui hi a pawimawh ber chu a ni. Hnehna kan chan pawhin kan vai thawhrah a ni a, kan tlawm pawhin a mawhphurtu bik kan awm lo a, hei hi ka pawm dan a ni reng," a ti a, fakna dawn bik a duh lo.

Switzerland hian Zirtawpni zanah Serbia an hmachhawn zui dawn a, last 16 luh beiseina a la bo bik lo - hnehna an chan chuan knockout round an lut ang.