Aizawl FC kan hneh avangin mipui an phur lehzual - Rindika Hmar, Venghnuai coach

FC Venghnuai chuan Honda MPL9 final lut turin champion lai leh champion ngun ber Aizawl FC an hneh a, final an lut. Nomawi inchuhna hi December 6, Thawhlehni zan hian Venghnuai leh Chawnpui FC ten RG Stadium-ah an khel ang.

Venghnuai coach Lalrindika Hmar chuan, "Group match hnuhnung bera Chhinga Veng kan hneh lo kha pawi kan ti a, a chhan chu Aizawl FC kan tum hreh vang a ni. MPL-ah ṭum hnih kan hmachhawn a, kan hneh loh ve ve bakah league round an thunun avangin hmachhawn kha an huphurhawm hrim hrim.

"Vengchhung mipui thlawpna ṭha tak leh player-te thawhrimna bakah Pathian malsawmna dawngin Aizawl FC kan hneh a, kan lawm takzet. I League club meuh kan hneh avangin kan veng mipuite pawh an phur lehzual. MPL final meuh kan thleng a, a phurawm ve bawk," tiin Vanglaini a hrilh.

FC Venghnuai hian season ṭha tak an hmang a, coach Rindika Hmar hnuaiah I Day Football semifinal an thlen bakah MPL final an thleng a, nomawi an beisei mek. Kumin kumtir lam khan MPL U18 khelh a ni a, Rindika Hmar ho hian an champion.

Tunah chuan kum bithliah chauh ni loin Mizoram puma football inelna sang berah champion theihna hun ṭha a nei. Nimin pawh khan Venghnuai Fan Club-in player leh coaching staff te chaw hlui an buatsaihsak. Rindika chuan, "Theihtawp chhuahin final atan kan inbuatsaih a, kan innghahna erawh Pathian chauh a ni," tiin nomawi chawi tuma an thawhrim thu a sawi.