Juve president leh a thawhpuite an bang vek!

Juventus chuan chanchin duhawm lo bik an nei. Italian club hi an talbuai mek a, club thuneitu president Andrea Agnelli leh a thawhpuite chu Old Lady board aṭangin an bang.

Season hmasa Serie A-ah khan Juve hian palina ni chungin kum tawp an hmang, match hnuhnung berah Champions League khel turin an tling hram a nih kha, player ṭha lalut chunga an hun hman dan a duhawm lo hle.

Tun nipui bazar inhawn lai pawh khan player lei nan sum an hmang hnem a, hei hian sawi a hlawh. Season hmasa bik chauh tlir pawhin pound maktaduai 220 an hloh tling a, hei hi Italy rama club pakhatin season khat chhunga sum a hloh hnem record a ni hial.

Nikum November thla khan, club-in player a lei dan chungchang chhui chiang tur hian police rawih an lo ni hial tawh, kum 2019 leh 2021 inkara player an ziah luh dan chungchang an chhui mek.

Bang zingah hian vice-president Pavel Nedved pawh a tel a, ani pawh hi dan dik loa thil a tih leh tih loh chhui mek zingah a tel. Club thuneitu ṭhenkhat an ban chhan hi, anmahni leh club tana a ṭhat zawkna tur a nih thu an sawi.

Managing director Maurizio Arrivabene erawh a bang ve lo, club lamin enkawltu board a din thar leh hma chuan a hna ngai hi a la chelh chhunzawm rih dawn a, a dinhmun leh nihna zel tur erawh sawi chian a la ni lo thung.

Italian Football Federation (FIGC) kaihhruaina in, Juventus bakah hian Serie A club ṭhenkhat, an hming tarlan lohte chu pawisa an hman dan chungchangah dan bawhchhiat an nei em tih chhui an ni bawk.