Sindhu a chawl rih dawn

PV Sindhu chuan BWF World Tour Finals a khel dawn lo tih a sawi chiang a, a thiam zual pariat inelna hmachhawn turin a hming tarlan ni mah se a hliam a la dam chian theih loh avangin tournament hi a khel thei dawn lo.

A tira ruahman dan chuan BWF World Tour Finals hi China rama khelh tur a ni, mahse hripui leng vangin a hun ruat hmasakah hian a theih loh. December 7-11 chhung hian Bangkok-ah an khel ang.

Olympic medal pahnih dawng tawh Sindhu chuan, "Badminton Association of India (BAI) hnenah ka dinhmun chiang takin ka hrilh tawh, ka ke rek vei lam hliam a la dam loh avangin BWF World Tour Finals ka khel thei dawn lo," tiin a sawi.

Sindhu hi Indian hmeichhe zinga Olympic medal vawi hnih dawng thei hmasa ber a ni a, a sulhnu a ropui hle. Commonwealth Games 2022-ah khan gold medal a vaw chhuak a, mahse hliam a neih avangin a hnu lamah tournament a la hmachhawn leh lo.

Hyderabad nula chuan sawi zawmin, "Training ka nei leh thei tawh a, mahse inkhel tak tak tur chuan 100%-in ka la fit tawk lo," tiin a sawi a, a beisei dan chuan nakkum January thlaa a khelh tur Malaysia Open-ah a inlan thei tawh ang.