Messi leh Argentina hmachhawn tur Lewandowski ; Zaninah Group D dinhmun chinfel a ni dawn
Argentina leh Poland ten zanin dar 12:30 hian World Cup group match pawimawh an khel dawn, tlin leh tlak inkar a ni a, hmahruaitu an nih theih rualin an la tla thei ve ve - a hmuhnawm ngei ngei dawn. Saudi Arabia leh Mexico ten an inkhel bawk ang.
Group D hmahruaitu Poland, pahnihna Argentina, pathumna Saudi Arabia leh a hniam ber Mexico ten last 16 an la lut thei vek a, tumah tling chiang an la awm lo bawk, an dinhmun chingfel turin minute 90 ṭheuh an nei ang.
Lionel Messi avang ringawt pawhin Argentina inkhel entu an tam ṭhin. Barcelona captain hlui thawm ang em emin lian lo mah se, Poland captain Robert Lewandowski hi Catalan club lamin Messi hmun ruak hnawh khat thei tura an beisei, an lak kha a ni.
A chak zawk nih a pawimawh, tlang mai bakah group hmahruaitu nih an tum dawn, pahnihna ni chunga tlang chuan last 16-ah group D hmahruaitu hmachhawn a ngai dawn - France an tum thei dawn tihna.
Messi awmna
Saudi Arabia laka an mualpho hnu ni liah Argentina an tho chhuak leh a, captain Lionel Messi hoin Mexico 2-0 in an hneh a nih kha. Hnehna an chan hnuah coach Lionel Scaloni chuan, "Leo hi kan beiseina siamtu a ni," tiin a sawi.
Argentina captain hian match hnih aṭangin goal hnih a khung tawh, zaninah pawh goal khung tura beisei a ni a, tlarhnung phui ṭha ve tak Poland paltlang erawh thil awlsam a ni dawn bik lo, chutih rualin Messi hi chuan thil harsa leh theih loh anga ngaih a ti fo.
Messi hi Angel di Maria leh Lautaro Martínez ten tlarhma lamah an thlawp leh ang, tun World Cup-a goal la chhuah lo Poland tan anni pathum ven hi thil chakawm lo tak a ni ve ang, kil tinah an fimkhur em em a ngai dawn.
La Albiceleste coach Scaloni-a'n Saudi Arabia lakah hliam damkawr Cristian Romero a ring sual a; Mexico an hneh ṭum chuan Lisandro Martinez-a'n bul a ṭan a, zaninah pawh Manchester United defender hi a inlan a rinawm.
Martinez hi 5ft 9in chauha sang a ni a, a ven tur Lewandowski erawh 6ft 1in a sang niin, ball kangah a hlauhawm ṭhin. Argentina tlarhnungah Nicolas Otamendi a pawimawh zual dawn tihna a ni a, match hnuhnunga bench aṭanga lut Romero hmel kan hmu thut thei bawk.
Lewy awmna
"World Cup a khel ve tawh, tih ai chuan World Cup-ah goal a khung tawh, tiin min hre reng se ka duh," tiin Robert Lewandowski-a'n a sawi a, a duhthusam hmasa chu Saudi Arabia lakah a ti hlawhtling tawh, tunah chuan last 16 luh chu an tum a ni leh mek.
Barcelona striker hian kum 34 tlin hnuah World Cup goal hmasa ber a khung ve chauh a, a theihna leh thiamna nena chhut chuan a mak angreng, an ram Poland tana goal 77 khungtu a ni tih hriat phei chuan football inelna liana a sulhnu hi a awihawm loh zawk hial.
Lewy-a'n goal account a hawng tawh a, goal khung thei bik a nih avangin a chawlhsan thut lo ang tih a rinawm - Argentina tlarhnung tan ani ven hi hna pui ber tur a ni dawn. Juventus tana khel lai Arkadiusz Milik an neih bawk avangin tlarhma lam chu an ṭha ve tawk.
Poland ṭhat ruk riauna chu an tlarhnung phui hi a ni, defender pali Matty Cash, Kamil Glik, Jakub Kiwior leh Bartosz Bereszynski ten bul an ṭan rual vek ṭhin a, anni hnungah hian goalkeeper Wojciech Szczesny a awm, an thawhhona ṭha hi an hmachhuan leh tur a ni dawn.
Poland coach Czeslaw Michniewicz chuan, "Goal venhim a pawimawh, chutih rualin goal khung kan tum ang," tiin inhnehtawk ringawt a duhtawk lo a, chak tuma Argentina an hmachhawn tur thu a sawi a, inkhel hmuhnawm min hlui ngei ang.
Ngaihnawm
• FIFA World Cup bikah Argentina leh Poland te hi an vawi thum in hmachhawnna tur a ni. 1974 khan Poland hian 3-2 in hnehna an chang, 1978 khan Argentina lam hi 2-0 a chakin an champion zui bawk.
• Kum 2011 June thlaa friendly match an khelh hnuah, ram pahnih hi an intawn lehna hmasa ber tur a ni. An inkhelh hnuhnung ber hian Poland 2-1 in an chak.
• Poland hi World Cup-ah South American ram hrim hrim an hmachhawn hmasak pasarih zinga paliah an chak, mahse an tum hnuhnung pathumah erawh goal khung loin an tlawm vek thung.
• World Cup-ah Argentina hian European ram a zawnin vawi hnih an ngam lo. Croatia (3-0) leh France (4-3), tun hmain European ram lakah a zawna vawi thum chak loh an la nei ngai lo.
• Poland hian World Cup hmasa nena chhiar zawmin, an match hnuhnung pathumah goal a chhuah miah lo, heng inkhelah hian an khingpuiten 'shot' vawi 27 ngawt nei mah se an goal an venghim.
Thil Awmzia
Poland-in Argentina laka point an hmuh chuan second round an lut ang. An chak lo a nih pawhin Saudi Arabia-in Mexico laka point thum an hlawhchhuah loh chuan an la tling thei a, goal difference a pawimawh thung dawn.
Argentina tan midang result-a innghat loa tling tur chuan Poland an hneh a ngai a, an inhnektawk erawh chuan Saudi Arabia leh Mexico result thlir a ngai dawn. Saudi an chak chuan Argentina an tla a, an inhnehtawk emaw Mexico an chak emaw chuan goal difference en a ngai ang.
Saudi Arabia-in Mexico an hneh chuan an tling a, an inhnehtawk erawh chuan Poland-in Argentina an hneh sak a ngai thung.
Mexico tan chak ngei ngei a ngai a, Poland leh Argentina inkhel result-ah an innghat tel bawk. Poland-in Argentina an hneh a ngai a, an inhnehtawk erawh chuan goal difference en tur a nih avangin goal li tala an chak a ngai ang.