FIFA World Cup - Tlin theih dan leh tlak theih dan
FIFA World Cup boruak a hot chho zel. Nizan khan group A leh group B ten group match an khel zo a, second round lut team pali a chiang tawh. Chutihrualin group pahnih result hi kan hre hman lo.
Tun ṭumah hian group C-H aṭanga team tlin theih dan leh tlak theih dan tarlan a ni. Group match hnuhnung berah hian group khat zel hi a rualin an khel a, match hmasa zawk hi zan dar 8:30-a khelh niin match hnuhnung zawk hi chhun dar 12:30-ah khelh a ni thung.
Group C
Poland-in Argentina laka point an hmuh chuan second round an lut ang. An chak lo pawhin Saudi Arabia-in Mexico laka point thum an hlawhchhuah loh chuan an la tling thei a, goal difference a pawimawh thung ang.
Argentina tan midang result-a innghat loa tling tur chuan Poland an hneh a ngai a, an inhnektawk erawh chuan Saudi Arabia leh Mexico result thlir a ngai dawn. Saudi an chak chuan Argentina an tla a, an inhnehtawk emaw Mexico an chak emaw chuan goal difference en a ngai ang.
Saudi Arabia-in Mexico an hneh chuan an tling a, an inhnehtawk erawh chuan Poland-in Argentina an hnehsak a ngai thung.
Mexico tan chak ngei ngei a ngai a, Poland leh Argentina inkhel result-ah an innghat tel bawk. Poland-in Argentina an hneh a ngai a, an inhnehtawk erawh chuan goal difference en tur a nih avangin goal li tala an chak a ngai ang.
Group D
France an tling tawh. Group hmahruaitu ni chiang turin point khat a tawk a, an chak lo a nih pawhin Australia-in Denmark an sawp viau a nih loh chuan pakhatna dinhmun an la luah tho ang.
Australia tan tling chiang turin Denmark hneh a tawk a, Tunisia lakah France an tlawm a nih loh chuan draw chauh pawhin an tling thei bawk.
Denmark tan Australia hneh ngei ngei a ngai a, chutihrualin Tunisia-in France an hneh ve bawk a nih chuan goal difference a pawimawh ang.
Tunisa tan beiseina nei turin France an hneh ngei ngei a ngai a, Australia lakah Denmark an tlawm loh a ngai bawk.
Group E
Spain tan tling turin Japan laka point hmuh a tawk. An chak lo a nih pawhin an goal difference a ṭhat avangin tling turin an dinhmun a ṭha a, Germany-in goal sarih chhoa Costa Rica an sawp a nih ngawt loh chuan an tla thei lo.
Japan tan tling turin Spain hneh a ngai a, an inhnehtawk a nih erawh chuan Germany leh Costa Rica inkhel result an ngaihchan a ṭul dawn
Costa Rica tan tling turin Germany hneh a tawk a, inhnehtawk chunga tling tur chuan Spain-in Japan an hnehsak a ngai.
Germany tan tling tur chuan chak ngei a ngai a, Spain ṭanpuina an mamawh tel bawk. Spain-in Japan an hneh chuan Germany tan chak a tawk a, Spain leh Japan an inhnehtawk a nih chuan Germany tan goal hnih tala Costa Rica hneh a ngai ang.
Group F
Croatia tan tling chiang turin Belgium laka point khat hmuh a tawk. Chak lo chunga tling tur chuan Canada-in Morocco an hneh a ngai.
Morocco tan tling turin beisei tur nei tawh lo Canada laka point khat hmuh a tawk a, hna harsa a nih tawh loh avangin Croatia emaw Belgium emaw an tlak a rinawm hle. Chak lo chung pawhin tling theihna dan tur kawng zau tak a la inhawng.
Belgium tan tling turin Croatia an hneh a ngai. Chutihrualin an inhnehtawk a nih erawh chuan Canada-in Morocco an hnehsak a ngai a, goal difference en tel a ngai bawk ang.
Canada tan beisei tur a awm tawh lo.
Group G
Brazil an tling chiah tawh a, hmahruaitu ni chiang turin point khat la mamawh mah se an chak lo a nih pawhin hma an hruai a rinawm tawh zawk.
Switzerland tan tling chiang turin Serbia an hneh a ngai a, inhnehtawk chunga tling tur chuan Brazil-in Cameroon lakah point an hlawhchhuah a ngai. An chak lo erawh chuan an tla thung.
Cameroon tan tling tur chuan Brazil an hneh ngei a ngai a, Serbia leh Switzerland result an ngaihchan tel a ṭul bawk. Serbia leh Switzerland inhnehtawk hi Cameroon tana ṭha ber a ni a, Serbia an chak a nih erawh chuan goal hniha aia tama an chak loh a ngai.
Serbia tan second round lut turin Switzerland an hneh ngei a ngai a, inkhel dang result-ah an inngat bawk. Brazil-in Cameroon an hneh a ngai a, an in draw erawh chuan goal difference bakah an goal khung zat thlengin en a ngai thei ang.
Group H
Portugal an tling tawh a, South Korea an hneh lo a nih pawhin hmahruaitu ni turin an dinhmun a ṭha hle.
Ghana tan tling chiang turin Uruguay an hneh ngei a ngai a, an inhnehtawk a nih pawhin Portugal-in South Korea laka point an hmuh chuan an la tling tho. Chutihrualin an inhnehtawk hian South Korea hi goal hnih tala an chak loh chuan second round an lut tho ang. Ghana hi an chak lo erawh chuan an tla.
South Korea tan tling tur chuan chak ngei a ngai a, an chak a nih pawhin Uruguay leh Ghana inkhel resutl-ah an innghat. Ghana hi an chak a nih chuan South Korea tan beisei tur a awm dawn lo a, South Korea-in beiseina an neih theih nan Uruguay-in point an hmuh a ngai. Hemi hnu hian goal difference la en leh tur a ni.
Uruguay tan beiseina tur chuan Ghana an hneh a ngai a, an chak a nih pawhin Portugal leh South Korea-ah an innghat. Portugal-in point an hmuh chhuah a, hnehna an chak bawk a nih chuan an tling. Chutihrualin South Korea zawk an chak a nih chuan Ghana tan tling tur chuan South Korea chakna aia goal khata an chak tam a ngai ang.
Tehfung chu
1. Point a pawimawh hmasa ber. Chak (3 pts), inhnehtawk (1 pt) leh chak lo (0 pts).
2. FIFA inelnaah hi chuan point hmuh a inang a nih chuan goal difference (GD) a pawimawh a, GD tih hian group match zawng zawnga goal difference en tur a ni.
3. GD a inang a nih chuan group match zawng zawnga goal khung tam (Goal For) en leh tur a ni.
4. Points bakah GD leh GF hmanga chinfel theih a nih loh chuan head to head en tur a ni. Head to head-ah hian pts, GD leh GF inang team-te intumna (head to head) points en tur a ni a, team intlukte hi team hnih aṭanga team li thleng pawh an ni thei a ni.
5. Head to Head-a an point hmuh a inang a nih head to head-a GD en leh tur a ni.
6. Head to Head-a pts leh GD a inang a nih chuan head to head-a GF en leh tur a ni.
7. Tehfung 1-na aṭanga 6-na thlenga a la inang vek a nih chuan group match-a Fair Play point hmanga en tur a ni ang. Yellow Card : -1 pt; Indirect red card (second yellow card) : -3 pts; Direct red card: −4 pts; Yellow card and direct red card: −5 pts. Match khatah player pakhat hi hremna chi khat chauha point paih theih a ni.
8. An la inang vek a nih chuan ṭhumvawr tur a ni ang.