Bayern-in Ronaldo an la dawn lo - Kahn

Portugal captain Cristiano Ronaldo-a'n club a nei lo a, January transfer-a a kalna tur an inrinsiak mek. Manchester United forward hlui Ronaldo la thei tur zingah Bayern Munich pawh telh an ni a, amaherawhchu nimin khan Bayern CEO Oliver Kahn chuan an lak loh tur thu a tichiang.

2002 FIFA World Cup best player Oliver Kahn chuan, "Ronaldo chungchang hi kan ngaihtuah a, lak pawh kan duh. Mahse kan kalphung nen a inmil lo. Squad din dan kawngah club hian kalphung nghet tak leh tum mumal tak a nei a ni," tiin a sawi.

Bayern hian nikum nipui bazarah khan Germany international defender Niklas Sule chu a hlawh an san thei lo a, Dortmund a pan zui. German champion hian player-te hi an phu tawk aia tam hlawhtir an tum lo. Hemi a nih avang hian khawvel footballer hlawh tam zinga tel pha Ronaldo lak an tum lo hi a mak hran lo.

Bavarians hi Harry Kane nen pawh sawizawm an ni a, Robert Lewandowski hmun ruak hnawh khattu tur an zawng mek. Kahn chuan, "Kane hi player ṭha tak a ni a, player ṭha dang pawh an tam. Kil tinah Kane leh Kahn an ziak kawp a, thuthang mai a ni," a ti a, striker lak an tum thu a sawi.