Group E- Beisei nei pali, tling tur pahnih ; Spain, Japan, Costa Rica leh Germany
FIFA World Cup 2022 aṭangin football ram lian tiha sawi theih Germany chu tla thei dinhmunah an ding. Hansi Flick-a hote hian zanin dar 12:30 hian Costa Rica an hmachhawn ang a, an chak a nih pawhin Japan leh Spain inkhel result ngaihchan a ṭul dawn.
Group E ram pali Spain, Japan, Costa Rica leh Germany te hi tling thei leh tla thei vek an ni a, zanin hian bukin an awm dawn. Tuna an dinhmun thlirin 2010 WC champion La Roja-in second round an luh mai a rinawm a, Germany erawh an dinmun a ṭha lo.
Spain Vs Japan
Spain leh Japan hi ṭum khat chauh an la inkhel a, kum 2001 daih tawh khan team pahnih hi friendly match-ah an inhmachhawn a, La Roja 1-0 in an chak. Tun ṭum hi competitive match-a an inkhelhna hmasa ber tur a ni a, Luis Enrique hote leh Hajime Moriyasu naute inkhel hi a hmuhnawm ang.
Japan hian match hmasa bera Germany an hneh khan an tiat lo hle. Tun ṭumah erawh an pumruaa an tiatpui Spain an hmachhawn dawn a, leiah chauh ni loin ball kangah pawh an hlauhawm thei ang. Amaherawhchu Enrique enkawl Spain hi chu ram team zinga ball inpe kual thiam ber tia chhal ngam an ni a, Japan tan inkhel thunun beisei ngam chi a ni lo.
Manager Hajime Moriyasu-a'n Costa Rica lakah inkhel bul ṭan tur a siksawi a, result ṭha a neihpui lo. Blue Samurai hian Costa Rica lakah chak phu mah se an chak zawh miau loh avangin second round lut turin an hna a harsa ta vek.
Germany lakah Japan hian goal hnih khung bawk mah se counter attack aṭanga an khung tih hriat a ṭha a, goal venhim tum Costa Rica lakah minute 90 chhungin goal an khung thei lo. Blue Samurai-in insiksawi leh hret an mamawh a; Europe lama tawnhriat nei ṭha Takumi Minamino, Takefuso Kubo leh Kaoru Mitoma ten an theihna an lantir theih nan khelh hun tam zawk an mamawh.
Spain erawh right back-ah César Azpilicueta aiah Dani Carvajal a lut tih loh chu bul ṭantu zingah thlak an nei lo a, midfield-ah Barcelona player-ten rorelin defence laiah Man City player Rodri leh Aymeric Laporte te an inkawp. La Roja hian ball an in pass nasa a, knockout inlenaah chuan inkhel thunun pawhin goal an khung tel a ngai. Japan lakah Spain 'tlarhma' fiahin an awm dawn.
Costa Rica vs Germany
Costa Rica hian Japan lakah point thum hlu tak an hlawh chhuak a, Spain laka mualpho hliahkhuhna chauh ni loin second round luh beiseina siamtu a ni. Mahse, Costa Rica hian Japan laka point thum hlawh chhuak turin vanneihna an mamawh a, an attack chhunah an ti goal.
Team pahnih khelh tawh dan thlirin Germany tan Costa Rica laka point thum hmuh hi thil harsa tur niin a lang lo a, chutihrualin keeper Keylor Navas khelh ṭhat ṭum an tawng a nih erawh chuan vanduai thei an ni tho.
Germany tana chanchin lawmawm erawh team enkawltu hi Hansi Flick a ni a, attacking khel thiam coach a ni. Flick-a hnuaiah Bayern Munich-in match tinah 2.97 goal an khung pha a, a enkawlna hnuaiah Bavarians-in Barcelona 8-2 zetin an sawp.
Flick-a hnuaiah Germany hian Armenia 6-0 in an sawp tawh a, Liechtenstein phei chu 9-0 in an sawp a, European champion Italy pawh 5-2 in an sawp thei. Germany hian inkhel dang result-a innghat lo tur chuan goal riata Costa Rica an hneh a ngai a, Flick-a hote hian 'thilmak' thlentir an tum ang.
Chutihrualin Japan tan Spain hneh a harsa dawn a, Germany tan Costa Rica goal hniha hneh hi a tawk thei. Tlarhma lamah Leroy Sane a dam tawh a, rawlthar duhawm Jamal Musiala-a'n a theihna sanzia a lantir tawh a, Serge Gnabry leh Thomas Muller ten goal an khung a ngai. Bayern player langsarten goal an khung thei lo a nih chuan Flick-a'n ram tan vawi thum bench aṭanga inlana goal hnih khung thei Niclas Fullkrug chungah rinna a nghah a ṭul ang.
Group E Team dinhmun chu
Khalifa International Stadium-ah Spain leh Japan an inkhel dawn. La Roja tan group hmahruaitu ni turin chak a ngai a, second round-a an hmachhawn theih chu group F an ni.
Group F aṭangin Croatia, Morocco leh Belgium te an la tling thei a, an inkhelh hma hian an khelh zawh tawh dawn avangin Spain hian second round-a an khingpui tur an thlang thei hial ang. Mahse, Luis Enrique hote hian chak an duh ang.
Spain hi an chak lo a nih pawhin Costa Rica 7-0 a sawptu an nih avangin an tlin tho a rinawm a, an khingpui tur Japan tan erawh tling chiang tur chuan chak a ngai. Blue Samurai hi Spain nen an inhnehtawk erawh chuan Al Bayt Stadium-a Germany leh Costa Rica inkhel result-ah an innghat ang.
Costa Rica pawh an chak a nih chuan an tling chiang dawn a, an khingpui tur hi Germany a ni thung. Vawi riat ngawt final lut tawh leh vawi li champion tawh Germany hian second round lut tura chak an mamawh ve tho avangin Costa Rica tan chak a harsa ang. Hansi Flick hote hian Spain puihna an mamawh a, La Roja hian Japan laka point khat chauh an hlawhchhuah chuan Germany tan goal hniha chak a ṭul thei ang.
Chutihrualin Japan-in Spain an hneh thung chuan Germany tan goal sarih chhoa Costa Rica an sawp a ṭul dawn a, thil theih loh tluk a ni.