Thi leh dam kara leng Belgium Tlang turin Croatia hneh a ngai

Kevin de Bruyne, Eden Hazard, Romelu Lukaku leh Thibaut Courtois te awmna Blegium chu thi leh dam kara leng mek an ni. Red Devils hian zanin dar 8:30 hian Croatia an hmachhawn dawn, last 16 lut turin chak ngei ngei a ngai.

Group F-ah Belgium hian match hnih aṭangin point thum an hmu a, pathumna an ni mek - zanina an hmachhawn tur Croatia tan tlang turin point khat hmuh belh lek pawh a tawk, an chak lo a nih pawhin inkhel dang result a zirin an la tlang thei tho bawk.

Belgium erawhin Croatia an hneh loh chuan an tla chiang a, an inhnehtawk a nih pawhin, inkhel dangah tla chiang tawh Canada lakah Morocco chu goal thum aia tamin an tlawm a nih loh chuan an tlang thei dawn chuang lo - a awlsam zawngin, an chak ngei ngei a ngai.

Team chhung boruak
An match hmasa berah Belgium hian Canada 1-0 in an hneh hram, an khel ṭha tawk lo. Khawthlang media ho tarlan dan chuan inkhelh bakah Kevin de Bruyne chuan, "World Cup champion tur chuan kan upa tawh lutuk," tiin a sawi, mahse KDB hian a pha thung.

Morocco nen an inkhel leh a, si hnih faiin an chak lo. Kum 35 mi, defender Jan Vertonghen chuan, "Kan upa tawh lutuk a ni ang, goal kan nawr na lo," tiin a sawi ve thung, a nihna takah chuan Belgium team chhung boruak a ṭha lo tih a sawi ngam.

Player pahnih thusawi lai video a awm hran lo, mahse media lian ESPN-in an tarlang ngam a, a rintlak tura ngaih a ni. Goalkeeper Courtois chuan, "Kum upa hi chhuanlama hman chi a ni lo. Real Madrid-ah Karim Benzema leh Luka Modric kan nei," a lo ti ve thung.

Player langsar pathum ṭawngkam a darh a, kan boruak a ṭha lo tiiin sawi kher lo mah se an thawhhona a ṭha tawk lo tih a chiang. Croatia hneh tur chuan boruak ṭha an mamawh, coach Roberto Martinez-a'n a siamṭha hman em tih chu kan hmu dawn.

Inpumkhatna
Hliam vangin Belgium hian striker ṭha Lukaku chu an la chhawr mumal lo, an match hnuhnungah erawh bench aṭangin a lut tawh. Inter Milan hmatawng hi zaninah a inlan a rinawm, an ram tana goal khung hnem ber a nihna a lantir a ngai ang.

Belgium coach Martinez chuan, "Tun World Cup kan khelh bik kan thlir a nih chuan Belgium team ṭha tak kha kan la ni lo. Kan dinhmun a ṭha lo a ni mai thei, chutih rualin engkim hi kan kuta awm a la ni, kan chak phawt chuan kan tlang dawn.

"Ka sawi fo tawh angin Romelu hmun hi chu midangin a hmunruak hi an luah thei lo, ani a inlan thei a nih chuan kan harsatna ṭhenkhat a sukiang ang, a dinhmun erawh kan ngaichang leh deuh ang," a ti a, a striker chu chhawr theih a inbeisei.

Team boruak sawi zawmin Martinez chuan, "Inpumkhatna tel lo chuan engmah a thlen theih loh, ka naute hi ka hrechiang a, thawhhona ṭha lehzual zawk nen team ṭha kan ni dawn. Croatia lakah chumi chu kan hmuh ka ring," tiin a sawi.

Fimkhur a ngai
Croatia coach Zlatko Dalic tan player thlan fimkhur a ngai dawn, tlang tura an dinhmun a ṭhat rualin tla thei an la ni ve tho a, chak ngawr ngawr ai chuan goal chhuah loa point khat hmuh an tum a nih pawhin a mak lo ang.

Captain Luka Modric-a'n Canada an hneh ṭumin yellow card a hmu a, card a hmuh leh chuan match khat hrem tur a ni dawn. Kum 37 mi Modric hian tawnhriat a ngah tawh a, card hmu turin a che duh kher lo ang, chutih rualin inkhel boruak a san chuan sawi lawk a harsa.

Canada lakah a tir lama an chesual zeuh tih mai loh chu Dalic-a naute hi an tlarhnung a phui viau. Dejan Lovren leh Josko Gvardiol te tlarhnung laiah an inkawp leh ang a, a sirah Josip Juranovic leh Borna Sosa te an awm thung ang.

Belgium lamin Lukaku, Michy Batshuayi, De Bruyne leh Hazard te hmangin an rawn nawr dawn, chak ngei ngei ngai an hmachhawn dawn avangin Modric leh a ṭhianten tlarhnung lam an ven uluk chu a ngai dawn hle.