Wales an liam; England tan beiseina a vul zel

World Cup last 16 lut tura Wales-in an mamawh chu England laka goal li khung a, goal chhuah miah loh a ni. Mahse, Wales-in goal thum an chhuah a, goal khung an nei lo bawk.

Thawhlehni zan khan World Cup group stage-a an match hnuhnung berah England chuan 3-0 in Wales an hneh a, group B hmahruaitu ni chungin last 16 an lut - Wales tan erawh an World Cup thawnthu chu tihtawpin a awm ta thung.

Marcus Rashford chuan Three Lions tan bul ṭan a phu tih pholangin goal hnih a khung a, Phil Foden chuan goal khat a khung ve bawk. Wales-in a chhanletna tur an nei lo a, England hian last 16-ah Senegal an hmachhawn ang.

Group B inkhel dangah USA chuan Christian Pulisic goal hmangin Iran chu 1-0 in an hneh a, last 16 an lut ve bawk. Quarterfinal luh inchuhin Netherlands nen an inhmachhawn dawn thung.

Mipui ngaithlatu
England-in match hmasa berah 6-2 a Iran an sawp avangin fak an hlawh a, mahse, USA laka goal an khung loh zui avangin media thawm a na a, mipuiin Gareth Southgate-a team-te hi huaisen tawk lo tiin an sawisel bawk.

Southgate-a'n an ram mipuite lungawi lohna a ngaithla a, USA laka khel ṭha tawk lo Raheem Sterling, Bukayo Saka leh Mason Mount te bul ṭan nawntir loin, an aiah Rashford, Foden leh Jordan Henderson te bul a ṭantir.

Hliam vanga la inlan lo Kyle Walker pawh a dam tawh avangin a rawn kir a, Kieran Trippier aiah a lut - England-in Wales hmaah England thar an pho chhuak, tiin a sawi theih a, Three Lions squad chhahzia pholanna a ni tel bawk.

Hetihlai hian Wales-in first choice keeper Wayne Hennessey chu hrem vangin an chhawr thei lo a, Leicester City keeper Danny Ward chuan Wales tan si ban nghakin bul a rawn ṭan.

A hming Rashford
Wales-in goal khung an mamawh tih inhre mah se an hriam tawk lo a, chance hlauhawm nei hmasa pawh England an ni - minute 10-na lekah Harry Kane-a siamsak ṭha zet chu Rashford-a'n khungna remchang a nei a, mahse, Wales keeper Ward chu a hunah tak rawn tlan chhuakin, a dang ṭha hle.

Minute 38-naah England bawkin chance ṭha an nei leh a, mahse, Jude Bellingham-a'n ṭha taka ball a lakluh hnua a siamsak chu Foden-a'n goal-ah a chantir thei lo a, Wales an him hram.

Wales tan minute 45-naah an thiampuipa Gareth Bale chu hliam vangin lakchhuah a ngai zui a, Los Angeles FC forward hi khel ṭha lo mah se a tel lo chuan Wales tan goal li khung a harsa lehzual dawn tih a chiang.

Second half ṭan a ni a, Rashford a vannei ta nge nge. Manchester United forward hian freekick aṭangin ṭha zetin a chhuih goal a, Wales tana chona hautak sa chu a tih hautak belh.

A tawp ta
Rashford-a goal khung aṭangin minute khat awrh a liam hman. Mahse, England an phur laklawh a, Foden chuan England tan bul ṭan a phu tih pholangin, goal a rawn khung - Kane-a siamsak a ni.

Ahmad bin Ali Stadium, Doha-a inkhelah Wales beiseina a thamral ṭan a, goal hnih an chhuah hian last 16 luh beiseina nei turin goal ruk khung an mamawh tawh - a harsa tawh dawn tih a chiang.

Mahse, Wales hian beidawn an tum bik lo. Daniel James chuan mual vei lam sir aṭangin uiawm zetin a pet goal lo a, Kieffer Moore-a shot Harry Maguire-a lo tauh pial pawh Jordan Pickford-a'n a dang ṭha hle.

Wales-in an chance neih an chhawr thei lo a, England erawh an danglam. Minute 68-naah Rashford bawk kan hmu nawn a, English forward hian ṭha zeta ball a lakluh hnuah Ward-a kap karah a chhuih goal a, 3-0 in inkhel a tawp.

Mangṭha Wales
Kum 1958 hnua a vawi khat nan Wales-in World Cup an khel a, point khat chauh hmu chungin Qatar an mangṭha. Engtikah nge World Cup-ah an inlan leh ang? tih hi zawhna chhan harsa tak a ni.

Wales innghahna Bale leh Aaron Ramsey ten beisei an phak lo a, tun hnaia an inkhelh tam tawk lohna a lang. Chutihrual chuan player pahnih 'class' han hnim hnai hi Welsh player zingah an awm lo a, player pahnih 'nil' laia mawhphurhna la tur an awm lo.

Kum 33 mi Bale leh Ramsey (31) ten chuai lam an pan a, Joe Allen te pawh kum 32 mi niin uai lam an pan ve ṭan. Welsh football-in a vanglai a mangṭha ṭan mek tiin a sawi theih a, Wales fans tam takin inkhelh zawha kut beng chunga an player-te an la thlah khan chak zo lo chunga an player-te chunga an lawmna sanzia a pholang.

Liverpool legend Ian Rush, Craig Bellamy, Ryan Giggs leh Mark Hughes te ho tih theih loh kha Bale leh a ṭhiante hian tih puiin, Euro 2016 (semifinal), Euro 2020 (round of 16) leh World Cup 2022 (group stage) an khelhpui a, Welsh football chanchinah an hming a dai tawh lo ang.