Gakpo a vul, Qatar an zawr

FIFA World Cup-ah Netherlands forward Cody Gakpo hian match thum khelhah goal a khung vek a, group match hnuhnung berah Qatar 2-0 in an hneh. Louis van Gaal-a hoten match thumah point sarih an hmu a, group A-ah pakhatna niin second round-ah group B pahnihna United States an hmachhawn ang.

Inelna thlengtu Qatar erawh beisei an pha lo tluan a, World Cup thlengtu zinga point hmu lo awmchhun an ni. Félix Sánchez-a hote hian match hmasa berah Ecuador 2-0 in an hneh lo a, Senegal lakah 3-1 a tlawm lehin match thum an khelhah goal hnih vekin an chak lo.

Gakpo a vul
Cody Gakpo hi nipui bazara Manchester United nen sawizawm a nih avangin Europe club inkhel ngaihven ṭhinte tan chuan hming thar a ni tawh lo a, chutihrualin tun World Cup hi khawvel huapa a inphochhuahna hmasa ber a ni.

Kum 23 mi Gakpo hian minute 26-naah Memphis Depay laka a ball hmuh chu Davy Klaassen tan a kheng zeuh a, Ajax midfielder hian pe chhuak lehnghalin Gakpo hian box chhung lamah khalh lutin goal kilah mawi zetin a pet goal.

Nikum nipui bazarah Erik Ten Hag-a'n Antony a thlan tak avangin Gakpo a la ta lo a, PSV forward hian World Cup a hman ṭhat leh tak si avangin Manchester United-in Old Trafford-a an lalut dawn a nih chuan man to zawka an lakluh a ṭul tawh ang.

Goal hnih chauh
Netherlands-in second half minute 49-naah Frenkie De Jong hmangin an khung belh. Depay-a'n a ball ṭha hmuh chu goal-ah pet mah se keeper Meshaal Barsham-a'n a dansak a, hemi per hi De Jong-a'n goal ruakah a khung. Barca midfielder De Jong khung hi awlsam hmel mah se Qatar defender Ró-Ró aia a ṭuan ran zawk vangin a khung.

Oranje hian substitute Steven Berghuis hmangin khung belhah an inngai a, amaherawhchu VAR hmanga enlet hnuah ball-in Gakpo kut a per avangin pawm a ni lo. Netherlands-in Qatar lakah goal hnih chauh an khung a, an khel a nung tawk lo.

Netherlands manager Louis van Gaal chuan, "Ngaihdan chu in nei thei a, mahse ka pawm kher lo ang. Sawi zau kher pawh ṭul ka ti lo. Football kan thlir dan a inang lo. Final kan thleng ang em? Kan inhmu dawn nia," tiin an khelh dan sawisel mah se champion thei tur team an nih thu a sawi.