Aliou Cisse hoin Senegal-in last 16 an lut

FIFA World Cup-ah Senegal-in an player chhuanvawr Sadio Mane chhawr thei lo mah se coach Aliou Cisse hoin second round an lut. Senegal hian group match tawp berah chak ngei an mamawh a, Ecuador 2-1 a hnehin an mamawh point thum an hlawh chhuak.

Senegal hian December 4, Pathianni zan dar 12:30 hian England nen second round an khel dawn a, Gareth Southgate hote tan Aliou Cisse hote hmachhawn hi thil châkawm a ni lo ang.

Team ṭha zawk
Inelna ṭan hmain Ecuador aiin Senegal buk a rit zawk a, amaherawhchu an intum dawn meuh chuan point hmu tam zawk South America aiawh dinhmun a ṭha zawk.

Mahse, Senegal-in team ṭha zawk an ni tih an pholang a, Khalifa International Stadium-ah ṭan phat aṭangin an nawr na hle. Everton midfielder Idrissa Gueye-a'n inkhelh ṭantirhah goal ruakah a khung lo.

Tlarhmaa mal tlat Boulaye Dia pawhin keeper chauh a hmachhawn hnuah goal-ah a chantir thei lo bawk. Watford winger Ismaïla Sarr-a'n Ecuador defender Piero Hincapié lakah penalty a hlawh chhuak a, penalty hi pet zuiin minute 44-naah cool zetin goal hmahruai a khung.

Senegal chungnung zawk mah se minute 67-naah Ecuador-in Moises Caicedo hmangin siphurh an sut a, inkhel tawp zui se chuan Gustavo Alfaro hote hi second round lut tur an ni.

Mahse, Ecuador an insiamrem hmain minute thum hnuah Senegal-in captain Kalidou Koulibaly hmangin siphurh an sut lehnghal. Hun tawp thlengin inkhel boruak sang mah se Senegal-in goal an chhuah tawh lo a, 2-1 in hnehna an chang.

Cisse hnathawh ropui
Senegal manager Aliou Cisse hi kum 46 mi a ni tawh a, an ram tana football-a a hnathawh hi a ropui hle. Cisse hi a inkhelh hun laiin defender a ni a, Paris Saint-Germain bakah Birmingham City leh Portsmouth tante pawh a khel tawh. English player chu ni se player naran a ni ang.

Mahse, Senegal tan chuan Cisse hi player leh coach ropui bik a ni. Kum 2002 khan Cisse captain-na hnuaiah Senegal-in AFCON final an lut a, hemi kum vek hian FIFA World Cup-ah a vawi khat nan quarterfinal an lut.

Kum 2015 aṭangin Cisse hian Senegal hi a enkawl ṭan a, kum 2019 khan AFCON final thlenpuiin an ramin final vawi hnih an thlenna chauh a ni. Kumin kumtir khan a vawi khat nan AFCON-ah Senegal an champion a, kumin World Cup-ah knockout stage an lut leh bawk. Senegal hlawhtlinnaah Aliou Cisse a inrawlh zel a, a thlen chin hi a ropui tawh a, chutihrualin an zinkawng hi a la tawp lo - tun aiin a la ropui thei tlat.