Zaninah 1st Div League Final leh MPL Qualifier Mission Veng vs Sihphir Venghlun
Aizawl District Football Association (ADFA) hnuaia club ṭha bikte inelna - ADFA 1st Division League chu zaninah a hmawr bawk a ni dawn. Aizawl veng lian Mission Veng leh Sihphir Venghlun ten nomawi an inchuh dawn. Final a ni ringawt lo - inkhel hi MPL Qualifier a ni tel nghal dawn avangin a pawimawh lehzual.
Zanin dar 7:00 hian RG Stadium, Mualpuiah final khelh tur a ni dawn a, a hmunah a duh apiang tan en theih a ni ang. Mi pakhat tan en man Rs 30 zel a ni thung dawn a, chhungkua leh ṭhianhoa inkhel en a nuam ang.
Final chu
ADFA hnuaiah hian 1st division club pariat an awm. Lengpui Mini Sports Complex-ah vawi khat ṭheuh an inkhel kual a, chumi hnuah a sang pali ten semifinal an khel, tunah chuan a ṭha pahnih chauh an bang ta.
Mission Veng hian semifinal-ah Kanan an hneh. Kanan hi league round lama chak vek thei, hmahruaitu ni chunga tlang kha an ni. Mahse, semifinal-ah Mission Veng an ngam tlat lo.
Mission Veng hi an chak a ni satliah lo, KC Malsawmsanga goal hnih bakah Daniel Lalhruaitluanga, Lalawmpuia Hnamte leh Fredy Lalrinchhana te goal khat ṭheuh hmangin 5-0 in an sawp, palina ni chunga tlang ni mah se champion turin theihna an nei.
Sihphir Venghlun thawm a ring ve bawk. Anni hian semifinal-ah Dinthar 2-1 in an hneh. Inkhel thiam veng, Mizoram Premier League champion hmasa ber ni bawk Dinthar meuh hneh thei an ni a, inrintawkna an nei sang khawp ang.
MPL Qualifier
Aizawl DFA hnuaia 1st Div finalist te hian MPL Qualifier an khel mek bawk a, qualifier-ah hian team pali telin vawi khat ṭheuh an inkhel chhuak dawn. MFA, Aizawl DFA leh club-ten inremna an siam a, final hi qualifier inkhel pakhat a ni nghal dawn.
Mission Veng hian match hmasa bera Project Veng an hneh loh avangin chak hi a pawimawh dawn a, Sihphir Venghlun pawh hi match hmasa berah SYS, Lunglei nen 2-2 in an inhnehtawk - an dinhmun a ṭha bik lo.
MPL qualifier bikah hi chuan minute 90 chhunga an inkhel result en a ni ang a, an inhnehtawk a nih chuan team pahnihin point khat ve ve an hmu ang. Extra time leh penalty shootout erawh chhiar tel a ni tawh lo ang.
Nimin khan MPL qualifier-ah Project Veng chuan SYS FC 2-0 in an hneh a, Kolasib club tan hian Ricky Rohmingliana leh VL Remruata ten goal an khung.
Project Veng hian match hnih an khelh tawhah hnehna an chan ve ve avangin MPL khel turin an dinhmun a ṭha hle.
World Cup lai a ni a, khawvel pumah football-in ngaihven a hlawh zual. Mizote pawh kan bang bik lo, mahni in lumah TV kaltlangin kan en nasa. Zanin bik erawh Mission Veng leh Sihphir Venghlun mipuite chuan RG Stadium, Mualpuiah football hmuhnawm an en zawk dawn a ni.