Mumbai City leh Goa intawng dawn

Indian Super League hmahruaitu Mumbai City chu zanin dar 7:30 hian an inlan dawn a, FC Goa nen an intawng dawn - Mumbai tan an tlawm chuan, Inrinni zana Chennaiyin lenchilh tur Hyderabad-in hnehna an chan chuan an tlanpel lehnghal thei dawn a, fimkhur a ṭul.

Mumbai City hian season an hmang ṭha hle - tun season ISL-ah goal 23 ngawt an khung tawh a, an lamah goal kua chiah a la lut bawk. Goal khung tam lama anmahni hnaihtu Odisha FC, ATK Mohun Bagan leh Kerala Blasters ten goal 13 ṭheuh chiah an la khung a, league match riat khelh tawhah tlawm an la nei lo.

Maharashtra club-ah hian Lallianzuala Chhangte leh Lalengmawia (Ralte) Apuia ten hmun pawimawh an chang ṭhin a, Lunglei forward Lianzuala'n league match riat khel vekin goal thum a khung tawh.

Vaivakawn tlangval Apuia'n match sarih khelin goal khat a khung tawh a, midfield-ah hmun pawimawh a chang - hero of the match-ah vawi khat thlan a ni tawh bawk.

FC Goa lamah, Mizoram player Ayush Dev Chhetri chuan hmun pawimawh a chang a, Aizawl FC academy chhuak midfielder hi league match sarih an khelhah a la inlan kim vek - ISL-a season hmasa ber hmangtu tan chuan record duhawm a ni.