Kum tawpa chhuak tur Binotto

Ferrari team principal Mattia Binotto chuan kumin tawp rualin Formula 1 team a chhuahsan dawn tih a chiang ta, kum tharah chuan Italian team hlun hian hotu thar an neih a ngai dawn tihna a ni.

Thawhlehni zan khan Ferrari chuan thuchhuah siamin, "Kan tana a hna thawh ṭhat zawng zawng avangin lawmthu kan sawi," an ti a, an mi pawimawh kal chhuak tur hi an ui thu an tarlang tel bawk.

Kum 53 mi Binotto pawhin thlahna thu sawiin, "Ka company hmangaih tak, 1995 aṭanga ka lo chenchilh tawh ka chhuahsan dawn a ni a, kum 28 chhung chamchilh tawh han kalsan dawn meuh chuan rilru pawh a hrehawm.

"Team puitling tawh, mahse la ṭhang mek leh hmasawn zel a ni a, Ferrari hian ropuina sang leh ṭha tak tak a la chang leh ngei ang tih hi ka ringhlel lo, an kal zelna turah pawh duhsakna ka hlan," tiin a sawi.

Ferrari hi F1 team hlun berte zinga mi an ni a, driver ṭha tak takte pawhin 'car sen' khalh chu an duhthusam a ni ṭhin. Mahse, tun hnai kum 10 chhung vel chu Mercedes leh Red Bull an el phak lo, season tharah an ropuina neih let leh an tum ang.