Doncic hoin Mavericks an chak

Luka Doncic-a'n hun harsa an tawh laiin player ṭha bik a nihna a lantir a, nimin zing NBA regular season inkhelah Dallas Mavericks chu Golden State Warriors lakah 116-113 in hnehna a chanpui.

Tun hnaiah Mavericks hi a zawnin vawi li an chak lo, nimin zingah pawh hian rinkai lo zawk an ni. Season hmasa Western Conference final-a intawng tawhte inkhel hi a hmuhnawm a, a tawpah Doncic a langsar ber.

Doncic hian point 41 a nei a, triple double nei turin rebound vawi 12 a lak bakah assist ṭum 12 a nei bawk - a team tan chuan thlamuanpui tham a ni a, an chet fuh loh lai pawha chak pui thei a ni.

Mavericks tan hian Tim Hardaway Junior a pawimawh bawk, ani hian point 22 a nei. A point neih zingah hian hun tawp dawn minute hnih pawh awm tawh loha 3-points a vawm luh a pawimawh, hma an hruai theih chan a ni hial.

Golden State thiampuipa Stephen Curry-a'n point 32 a nei a, player dang zingah point 20 nei tling an awm lo. Steve Kerr-a naute hian season bul ṭan fuh viau mah se an zuih hma angreng viau, kuminah an chak leh chak loh (11-11) a inzat leh reng tawh.

Western Conference table-ah Warriors hi 10-na an ni, tun ṭuma an hneh loh Mavericks hi an chung chiahah an awm thung. An dinhmun a ṭha tawk lo, chutih rualin GSW aiin hmahruaitu Phoenix Suns chak tama chu match thum chauh a ni, an inkar a la hla hran lo.