USA-in Iran an thawn haw
Khawvel politics boruak avangin Iran leh USA an inhal takzet a, infiamna khawvela an intawn phei chuan chungnung zawk nih an duh ṭhin hle - Thawhlehni zan khan World Cup-ah an intawng a, a chungnung zawk chu USA an ni.
USA tan Christian Pulisic chuan 'Captain America' hming lem pek a nih chhan pholangin, inkhel boruak sangah mawhphurhna a la a, inkhela goal awmchhun a khung.
Iran-in 'Great Satan' ti meuha an sawi ṭhin, an huat em em USA lakah a chhanletna tur goal an nei lo a, puanthuah tel chungin Qatar an mangṭha a ṭul - a na an ti khawp ang!
Wales laka hnehna an lo chan ve tawh chu engmah lo mai a chang zo a, tlang tura draw result chiah mamawh Iran-in 1-0 a tlawmin World Cup an mangṭha.
Inhmelmakna chu
Kum 1980 daih tawh USA leh Iran te hian an inlaichinna chu an lo chhu chat tawh a, Iran sorkar hian, "Great Satan" tiin US hi an ko ṭhin hial - hei hian ram pahnih inlaichinna chhiatzia a pholang.
September thla khan Iranian hmeichhia Mahsa Amini chu a lu khuhna hman dan chungchanga Police kuta a awm laiin a thi a, Iran-ah chuan he thil thleng duh lohna leh sorkar demna nasa takin lantir a ni.
Iran sorkar chuan lungawi lohna lantirtute fuih phur zawnga a ruk a rala cheah US sorkar leh khawthlang ram ṭhenkhat chu a puh a, US football team chuan Iran nena an intawn hma hian social media lamah Iran flag chei danglam chu an tarlang.
US hian hei hi Iran rama thil thleng duh lohna lantirtute thlawpna lantir nana ti an ni a, Iranian Football Federation chuan FIFA hnenah USA chu game 10 atan hrem turin an ngen hial.
Boruak a 'hot'
Inkhelh hma thil thleng leh ram pahnih inkar boruak avangin inkhel boruak a 'hot' lo thei lo a, hetihrual hian team pahnihin awmze neia innawr an harsat a, Iran-in a tir lamah nawr viau mah se chance an insiam thei lo.
US tan Sergiño Dest a hmuhnawm a, Barcelona aṭanga AC Milan-a loan-a khel mek full back hian Iran tlarhnung a chhaih mangang fo a, Pulisic tlan chakna chu Iran tan lutihaitu a ni bawk.
Fulham full back Antonee Robinson pawhin hlauhawm taka ball thlawh luh a nei fo - minute 38-naah US-in Iran tlarhnung an ṭhiat ta nge nge. Juventus midfielder Weston McKennie-a siamsak chu Dest chuan Pulisic tan ṭha zetin a tauh.
Pulisic chuan Dest-a siamsak hi goal-ah a lo chantir zui a, mahse, a chesual zui - Iran keeper Alireza Beiranvand nen Pulisic hi an intauh a, minute 45-naah Pulisic hi lakchhuah a ṭul zui. Damdawi in panpui a ni a, last 16-ah inlan hman tura beisei a ni.
A tawp thlengin
Chelsea forward Pulisic lakchhuah ngai mah se goal a khung hman a, US an vannei - second half-ah Iran-in chance an nei nual a, mahse, target zawnah vawi khat chiah shot an neih theih avangin an tlawm.
Bench aṭanga luhtir, Brentford attacking midfielder Saman Ghoddos chuan uiawm takin bar chungah a thlawh a, Danish club Vejle midfielder Saeid Ezatolahi hun ṭha khawhral pawh uiawm a tling.
Iran chance ṭha bera chhal ngam chu Morteza Pouraliganji koah a tla a, mahse, Iranian club Persepolis centre back hian freekick aṭanga ball kal chu uiawm takin a tauh goal lo.
Celtic centre back Cameron Carter-Vickers-a'n a tih tluk vangin Mehdi Taremi-a'n penalty beisei mah se pek a ni lo a, Turkish club Kayserispor tana khel Ali Karimi pawhin a chance neih a chhawr loh kha a ui vawng vawng ang.