AIFF president-in MPL Final en dawn

All India Football Federation president Kalyan Chaubey chuan Honda Mizoram Premier League Season 9 final en turin Aizawl a rawn tlawh dawn.

MPL9 final hi December 6, Thawhlehni zan dar 7:45 hian FC Venghnuai leh Chawnpui FC ten RG Stadium-ah an khel ang.

Tun ṭumin hi AIFF president-in Mizoram a rawn tlawh hmasa ber tur a ni a , MFA chuan, "AIFF President lo zin tur hi lawmawm kan ti a, District Football Association hruaitute nen ṭha taka lo dawnsawna hun hlawk tâk hman tum a ni," tiin thuchhuah an siam.

Kum 45 mi Kalyan Chaubey hi footballer hlui a ni a, Tata Football Academy chhuak niin India ram club ṭha Mohun Bagan, East Bengal, Salagaocar, Mahindra United leh JCT tan a khelh tawh bakah India aiawhin a khel tawh bawk.

AIFF president-in Mizoram a rawn tlawh hmasa ber tur ni mah se Kalyan Chaubey erawh Mizoramah a rawn kal tawh. TFA-in kum 1993-a Mizoram an rawn tlawh ṭum khan Kalyan Chaubey hi a tel a ni.

Kalyan Chaubey hi September 2, 2022 khan AIFF president atan thlan tlin a ni a, president a nih hnuah hmachhawp hrang hrang neiin FIFA president Gianni Infantino nen pawh football-a India hmasawn dan tur an lo sawi dun tawh a ni.

MFA chuan, "December 6 zana MPL9 final en tur leh, Rajiv Gandhi Stadium-a AIFF President lawm turin Mizo mipui zawng zawng kan sawm," tiin thuchhuah an siam a, Mizo hmel lanna tur a nih avangin RG Stadium mawi tham mipui punkhawm a pawimawh hle.