Damdawi inah Pele an dahlut

Brazil legend Pele chu damdawi inah an dahlut a, a fanu Kely Nascimento chuan hlauhthawnawm a nih loh thu a sawi thung. ESPN Brasil-in a tarlan danin Pele hi Nilaini khan Albert Einstein Hospital, Sao Paulo-ah a vung nasat avanga damdawi inah an dahlut.

Pele hi kum 82 mi a ni tawh a, a taksa pawh a chak lo ve tawh hle. Kum 2020 kumtir lam khan a fapa Edinho chuan a pa chu a hriselna ṭhat loh avangin pawn chhuah a duh loh thu a lo sawi tawh. Kum 2019 khan zun kawng fel lo vangin damdawi inah a lut tawh a, kum 2020-a khan khel bawr ṭhat lohna avangin tiang leh wheelchair tel lo chuan a che sawn thei tawh lo.

Kum 2021 September thla khan Pele hi a ril puiah bawk a awm tih hmuchhuah a ni a, Albert Einstein Hospital-ah hian zai an zai. Hemi hnu hi chuan damdawi inah a entir chho ve reng a ni.

Kely Nascimento chuan, "Ka pa damlohna chungchang ngaihventu an ṭhahnem a, kan tih ṭhin dan pangngaia inentir kan ni. Damlohna thar a neih vang emaw hlauhthawnna tur a awm vang emaw a ni lo. Kum thar thleng chu damdawi inah hian a awm dawn a, a thlalak pawh kan rawn dah chhuak ang," tiin a sawi.

Pele fanu hian a pa hi a ṭhat thu sawi mah se ESPN Brasil erawhin Pele dinhmun hi a ṭhat loh thu an tarlang thung. Kum 82 mi Pele hi lung lamah harsatna a tawh bakah chemotherapy a lak mek hi a ṭhatpui loah a ngaih thu ESPN Brazil hian an ziak.

Mi ṭhahnem takin khawvela footballer ropui ber anga an sawi Pele hi Brazil tana pet goal tam ber a ni a, match 92-ah goal 77 a khung a; World Cup nomawi pawh vawi thum lai a chawi a ni.