Ghana mipui huat rawn Suarez
World Cup 2010 quarterfinal-a thil thleng kha Ghana mipuite chuan an theihnghilh thei lo - quarterfinal-ah Uruguay nen an inhmachhawn a, Dominic Adiyiah ball tauh luh ngei tur nia lang chu Luis Suarez chuan goalline-ah a kut pahnih meuh phar chhuak chungin a lo dang!
Suarez hi red card pek a ni a, penalty a chawi bawk. Mahse, Ghana tana pettu Asamoah Gyan chuan a chhuih goal lo a, hun tawp thlenga an inhnehtawk avangin penalty hmangin Uruguay an chak zui.
Ghana midfielder hlui Ibrahim Ayew chuan, "Kha inkhelah khan substitute ka ni a, kha thil thlen lai khan goal hnungah warm-up ka nei mek. Goal kan khung emaw ka ti a, African team zinga World Cup semifinal lut hmasa ber emaw ka inti hman.
"Ghana mipui zawng zawngin Suarez hi an hua a, Africa khawmualpuiin an haw vek. Ni e, kan haw takzet a, phuba lak ngei kan duh a ni," a ti - Ghana hian zanin dar 8:30-ah Uruguay an hmachhawn dawn.
Black Stars (Ghana sawina) player-ten an ram mipui duhna an hria ang tih a chiang a, chak ngei an duh dawn - an chak chuan last 16 an lut dawn a, an draw a nih pawhin South Korea-in si hnih aia tama Portugal an hneh a nih loh chuan an tlang tho ang.
Uruguay tan erawh chak ngei ngei a ṭul a, South Korea an chak loh a ngai bawk - a tawi zawnga sawi chuan, Uruguay tan tlawm a thiang lo a, midang puihna an mamawh tel bawk.
Suarez, Edinson Cavani leh Darwin Nunez nei chungin Uruguay hian tun World Cup-ah goal khung an la nei lo a, an lamah goal hnih a lut tawh thung - coach Diego Alonso-a'n sawiselna a tawk nasa a, attacking player nei ṭha si a, goal a nawr ngam lo chu dem a hlawh.
Mahse, Alonso hi insawifiahin, "Goal nawr kan chawlhsan a ni lo a, kan khingpuite an inkhel ve tho tih hriat a ṭha. Goal nawr kan duh lo a ni lo a, a chang chuan kan khingpuite hi an khel ṭha zawk ṭhin a, kan duh angin thil a thleng thei bik lo," a ti a, a insawifiahna hi Uruguay fans tan chuan a ngaihnawm chuang lo ang!
Uruguay infiamna chanchinbu lar Ovacion chuan, "Alonso-a 3-5-2 formation vangin Uruguay kan tlawm a, kan khelh dan ang hi chuan hnehna chan a har a ni," tiin an ziak a, hetihlai hian striker Cavani chuan ngaih ruat theih takin coach Alonso chungchang a lo sawi ve bawk.
Cavani chuan, "Kan buaina chu Alonso zawt rawh u, tactic vel chu a sawi thei zawk ang," a ti a, Uruguay hi zaninah an tlawm a, World Cup an mangṭha a nih ngat chuan Alonso dinhmun a derthawng zui ang.
Chutihrual chuan khawvela striker hmuhnawm ber pawl ni ṭhin Suarez leh Cavani te hi kum 35 ve ve an ni tawh tih theihnghilh loh a ṭha a, striker ropui pahnih sulhnu thlirin, an World Cup hnuhnung ber group stage-a an mangṭha a nih ngat chuan a pamhmai khawp ang.