South Korea tawn tur Portugal - beisei a la bo lo!
Cristiano Ronaldo vanga ṭantu ngah Portugal leh Mizo nulate ṭan rawn South Korea zanin hian an intawng dawn e - team pahnih hi zanin dar 8:30-ah an inhmachhawn dawn a, inkhel hmuhnawm a beisei ngam.
Match hnih khelh tawh aṭanga point khat chiah la neitu South Korea tan last 16 lut turin chak ngei ngei a ngai tawh a, Portugal erawh a thiam 16 zinga an tel tawh avangin an beisei tur chu group hmahruaitu ni chunga last 16 luh a ni.
South Korea tan knockout round luh theihna kawng hnih a la awm - a pawimawh berah chuan an chak phawt a ngai a, Uruguay-in Ghana an hneh ve bawk a nih chuan goal difference en leh phawt a ni ang.
Uruguay leh Ghana an inhnehtawk a nih chuan South Korea-in si hnih fai tala Portugal an hneh a ṭul dawn. A tawi zawnga sawi chuan South Korea tan chak ngei ngei a ngai a, midang puihna an mamawh tel bawk.
A awlsam dawn?
South Korea vanneihna chu Portugal-in last 16 an lut tawh hi a ni a, draw result-in group hmahruaitu an ni thei a, South Korea an ngam loh pawhin group hmahruaitu ni chunga last 16 luh theihna dan an la nei cheu.
Portugal boss Fernando Santos-a'n a neih ṭhat ber a thawhchhuahpui kherin a rinawm lo a, player langsar zingah Bruno Fernandes te hoin bul an rawn ṭan lo a nih pawhin thil awm lo a ni hran lo ang.
Portugal hian hliam vangin left back Nuno Mendes, centre-back Danilo Pereira leh attacking midfielder Otávio te ho an chhawr theih a rinawm lo sa a, South Korea tan kawng hawnin a awm.
Hetihrual hian Portugal hi group stage-a pahnihna an nih chuan last 16-a Brazil hmachhawn theihna dan a awm dawn a, hei hi pumpelh an duh dawn - Ronaldo hi record siam châka tuihal reng a ni tih theihnghilh loh a ṭha a, South Korea a hmachhawn a nih pawhin a mak lo ang.
Sulhnu leh nunhlui
South Korea boss Paulo Bento tan zanin inkhel hian danglamna riau a nei dawn - kum 53 mi coach hi Lisbon, Portugal-a piang a ni a, footballer ṭhin niin, Portugal tan match 35 a khel ve hman.
Portugal hi 2010-14 inkar khan a lo kaihruai tawh bawk a, zanina an hmachhawn tur team hi a hrechiang ve tawk. Chu mai a ni lo - Bento hian World Cup 2002-ah khan Portugal tana a match hnuhnung ber chu South Korea lakah a khel a, 1-0 in an tlawm.
South Korea leh Japan-in an inthlen ṭawm inelnaah hian group stage-ah Portugal an tla a, thinlung hliama khelmual chhuahsantu Bento-a'n an thinlung lo tina tawhtu South Korea chakpui tum chungin Portugal a hmachhawn dawn.
Hetihrual hian Bento hian khelmual sir aṭang erawhin South Korea hi a ho thei dawn lo. Ghana laka 3-2 a an tlawm ṭumin Bento a lawm lo fal a, red card a hmuh avangin pawn aṭangin team enkawl a ṭul dawn a ni.
Beiseina chu
South Korea tan chak ngei ngei a ngai a, beiseina a thi thiang lo.Taegeuk Warriors tan tlarhmaah Son Heung-min a ṭangkai leh dawn a, tlarhnung lama Napoli rinrawl Kim Min-jae pawimawhna pawh sawi hmaih theih a ni lo - tun World Cup-a goal la khung lo Son tan mawhphurhna lak a hun tawh hle.
Cho Gue-sung-a'n Ghana lakah hmabak a nei êng ve tawk tih pholangin, goal hnih ngawt a tauh lut a, kum 24 mi forward hian zaninah an ram tan goal khung hna a thawh leh a ṭul dawn.
Olympiakos midfielder Hwang In-beom-a'n midfield-ah a hna tlin taka a thawh a ṭul dawn a, hetihlai hian tun tournament-a hliam vanga chhawr theih loh Hwang Hee-chan a rawn kir thei dawn em, sawi theih a la ni lo.
Khelmual sira Paulo Bento awm lo chunga khelh chu South Korea tan thil harsa tura ngaih a ni a, mahse, assistant coach Sergio Costa chuan, "Paulo hi coach ṭha tak a nih avangin a tel lo tur hi a pawi ka ti. Mahse, hei hian kan thawhhona a tiṭha lehzual dawn a ni," a ti a, beiseina a nei.