Serbia vs Switzerland - a hmuhnawm dawn

Football khawvelah Serbia leh Switzerland hming lian lo mah se, Serbia leh Swiss player inkar boruak avang te, ram pahnih boruak avangtein team pahnih inkar hi a 'hot' lo thei ṭhin lo - zaninah an intawng dawn.

Serbia leh Switzerland ten World Cup last 16 luh beiseina an la nei ve ve a, zanin dar 12:30-ah an intawng dawn. Swiss team tan kalkawng a awlsam zawk hret - Serbia an hneh chuan an tlang ang a, Cameroon-in Brazil an hneh loh chuan draw a tawk bawk ang.

Hetihlai hian Serbia tan tlang tur chuan an chak a, Brazil-in Cameroon an hneh a ngai bawk - team pahnih tan kawng hawnin a la awm a, an mamawh chu hnehna chan a nih avangin inkhel boruak a 'hot' loh ring suh.

World Cup 2018-ah khan team pahnih an intawn ṭumin Granit Xhaka leh Xherdan Shaqiri ten goal an khung ve ve a, an goal khung chu an kuta mu lem siam chungin an lawm - Serbia nena ram inhal tak Albania flag pholanna pakhat a ni.

Xhaka leh Shaqiri te hi $10,000 ve ve chawitir an ni - player pahnih hi Albanian thisen kai an ni a, an chet dan hi Serbian mipuite chuan an haw hle - zaninah hneh let an châk dawn.

Mahse, Serbia tan phuba la turin captain Dusan Tadic, midfielder Sergej Milinkovic-Savic leh striker Aleksandar Mitrovic te chet ṭhat a ṭul a, Swiss team tan Xhaka leh Shaqiri bakah Breel Embolo leh Ruben Vargas te mawhphurhna a sang ang.