Brazil an insiksawi dawn

World Cup champion beisei ngam zinga mi Brazil chu zanin dar 12:30 hian Cameroon nen group stage match hnuhnung ber khel turin an intawng dawn a, Selecao hian last 16 an luh tawh avangin player insiksawi tura ngaih an ni.

Cameroon tan last 16 lut turin chak ngei ngei a ngai thung a, zanin dar 12:30-ah vek Serbia-in Switzerland an draw emaw an hneh a ṭul ang - inkhel lehlamah hian eng zawk pawh thleng se, goal difference en tur a ni dawn.

Brazil dinhmun
Brazil-in hliam vangin Neymar an chhawr thei rih dawn lo a, Switzerland lakah Neymar tel loa an goal nawr nat tawk lohzia hmuh turin a awm - Vinicius Junior chu Neymar awm loh laia mawhphurhna latu a ni a, coach Tite tan last 16 mitthla chunga chawlh hahdamtir chu thutlukna fing a ni ang.

Selecao hian hliam an nei nual bawk - khel bawr hliam vangin Alex Sandro an chhawr thei dawn lo a, Sevilla-a Manchester United aṭanga loan-a khel mek left back Alex Telles a luh a rinawm. Juventus right back Danilo pawh hliam vangin a la inlan thei dawn lo bawk.

Brazil an fimkhur
Tite-a'n hliam vang piahlamah last 16 luh tawh avangin player a siksawi dawn a, Nilaini phei kha chuan Tite-a'n an inbuatsaihna mipui lamin an lo hriat lawk duh loin, training chu media tana chhim theih loh turin a ti hial.

Cameroon lakah Manchester City keeper Ederson chu Alisson hmun ruaka ding tura beisei a ni a, tlarhma lamah pawh Antony leh Gabriel Jesus te bul ṭan tura beisei an ni a, Fabinho leh Bruno Guimaraes te pawh bul ṭan tawh tura ngaih an ni.

Cameroon hi
Serbia nen 3-3 a an inhnehtawk ṭumin Cameroon-in game hmuhnawm an pholang a, 3-1 a an hnufual hnuah point khat hlu tak an hlawh chhuak thei - zaninah pawh Indomitable Lions tana pawimawh chu hlauthawng loa khelh a ni dawn a, Brazil lakah chak an tum ngam a ṭul.

Vincent Aboubakar-a'n Cameroon match hmasa pahnihah bul ṭan lo mah se Serbia lakah bench aṭanga lutin danglamna a thlen a, Eric Maxim Choupo-Moting nena inkawp turin Brazil lakah bul ṭan tura beisei a ni.