France hnung zuitu Australia
Australia chuan kum 16 hnua a vawi khat nan World Cup last 16 an lut leh ta. Group D aṭangin France hnung zuiin Asia aiawh Australia hi an tlang, quarterfinal lut tur chuan Argentina an hneh a ngai dawn.
Nilaini zan group match hnuhnung ber inkhel a hmuhnawm, chak ngei ngei ngai ram pahnih inkhelah Australia hian Denmark chu 1-0 in an hneh, goal awmchhun hi Mathew Leckie-a khung a ni.
Inkhel dangah France chu Tunisia lakah 1-0 in an chak lo. An tlang chian tawh avangin Didier Deschamps-a'n a player ṭha tam zawk a chawlhtir a, hun tawp dawn lamah chak tumin thapui thawh hnuhnawh leh mah se a tlai zo tawh.
Mangṭha Denmark
Denmark hi champion tura rinkai ni chiah lo, mahse thleng sang thei tura rinkai zinga mi chu an ni phak. Euro 2020-ah semifinal an thleng a, a hnuah Nations League khel lehin France chu vawi hnih ngawt an hneh thei.
Mahse, manager Kasper Hjulmand-a enkawl team hian goal khung an harsat tlat. France hmachhawn tur tlarhma pathum ngawt a thlak; Martin Braithwaite, Brentford midfielder Mathias Jensen leh Andreas Skov Olsen ten bul ṭan mah se goal an pai lo.
An hun ṭha bera ngaih chu Jensen chungah a tla, ani hian Braithwaite-a thai pial dawng fuh mah se Australia captain Mat Ryan a paltlang thei lo, match thum aṭanga goal khat chiah khung thei an nihna chu a tawpah an tuar.
Aussies an tlang
Group D thlir chuan Australia hi tlang tura rinkai an ni lem lo, world ranking thlir pawha hniam ber an ni. Mahse, vawi khat ṭheuh an intum kual a, a tawpa champion lai France an tluk lohna chu goal difference chauh a ni.
Team ṭha an hmachhawn tih hriain an fimkhur a, counter attack chu an innghahna a ni. Denmark lamin Australian box chhungah ball an hloh, Aussies lamin rang zeta nawr let nghal thutin Leckie chuan Kasper Schmeichel tana dan ngaihna awm loin a khung.
Australia-in World Cup last 16 an luh hnuhnung ber chu 2006 daih tawh kha a ni, kha tih laia an player chu Harry Kewell, Tim Cahill leh Mark Schwarzer te an ni a, champion zui ta Italy an hneh lo, kuminah a aia sang thlen ngei an tum dawn.
Lawm a kim lo
Tunisia chuan an captain Wahbi Khazi-a goal hmangin France 1-0 in an hneh. Education City Stadium-a inkhelah Les Bleus tan hun tawp dawna substitute Antoine Griezmann-a goal khung chu VAR hmanga ennawn a nih hnuah an hnawlsak.
Chak mah se Tunisia an tla tho, manager Jalel Kadri chuan, "Lawmna leh lungngaihna a inchawhpawlh nuaih a ni ber mai. France te ang team ṭha kan hneh a nih chuan kan lawm tur a ni, mahse kan tlang phah si lo, hnehna lungchhiat thlak a ni," a ti.
Tunisia hian tun World Cup chhungin goal khat chauh an khung, mahse an captain Khazi-a'n France captain armband hrengtu Raphael Varane leh Axel Disasi te paltlanga goal a khung erawh an theihnghilh tawh ngai loh thil a ni ang.
Chak lo France
Match hmasa pahnihah an chak a, goal an khung hnem bawk avangin Tunisia an hmachhawn hma khan France kha pakhatna an ni chiang tawh. Coach Didier Deschamps-a'n a player ṭha a hahchawlhtir hlawm kha thil tih awm tak a ni.
Chutih rualin France squad hi a chhah tawk a, an khingpui Tunisia nena khaikhin chuan chak turin an la ṭha tawk. Hun tawp dawnah Paris St-Germain forward Kylian Mbappe leh Atletico Madrid hmatawng Griezmann te luhtir mah se a tlai zo tawh.
Eng inkhel pawh ni se chak loh hi chu a ṭha lo, chutih rualin World Cup khelh hma leh khelh mek laia player an hliam nasat dan chhut chuan France an indahṭha hi a mak lo, coach pawhin a tih tur dik tak a tiah a ngaih theih.