Mimal thil vangin White a inhnukdawk

Arsenal defender Ben White chuan mimal thil vangin England squad a chhuahsan a, kum 25 mi hi Qatar-ah a kir tawh a rinawm loh.

FIFA World Cup-ah hian squad siksawi dawn chuan match hmasa ber hmaa thlak a ngai a, England hian match thum an khelh tawh avangin White thlakna tur hi an la thei tawh dawn lo.

Arsenal defender White awm lo mah se England-in defence laia khel thei player pali Harry Maguire, John Stones, Eric Dier leh Conor Coady te an la kawl tho a, defender pathum an hmang a nih chuan Kyle Walker a la chhawr theih bawk.

England chuan, "Ben White chuan mimal thil vangin training-na hmun Al Wakrah a chhuahsan. Arsenal defender hi a rawn kir leh a beiseiawm tawh lo a, hun thawl a neih theih nan mimal zalenna zahsak turin kan ngen," tiin thuchhuah an siam a, Arsenal pawhin thuchhuah hmangin Ben White an thlawp tlat thu an tarlang bawk.

Southgate-a'n match thum an khelh tawhah Maguire leh Stones te a inkawptir vek a, match hnuhnung bera Wales an hneh ṭumin White hi damloh vangin a inlan lo. Chutihrualin English journalist pakhat Keenan Finch chuan, "England boss-in player ṭhenkhat hnenah khelmual chhunga luhna chance a tlem thu leh a ti kim tura hruai thu a sawi.

Hemi avang hian Gareth Southgate leh Ben White te hi thinrimin an inchhang a, White hian England camp a chhuahsan," tiin twitter-ah a ziak. Chutihrualin khawthlang media rintlak china ngaihte chuan White-a inhnuhdawh chhan hi an tarlan lo thung.