Aizawl FC tan Churchill hneh a ngai

Aizawl FC chuan vawiin tlai dar 4:30 hian Tilak Maidan, Goa-ah Churchill Brothers an hmachhawn dawn a, Mizo club hian I League nomawi chawi an duh a nih chuan hnehna an chan ngei a pawimawh hle. AFC hian damloh vanga coach Standly Rozario awm loh hnuah ṭum hnih khel leh tawhin an la chak lo ve ve, insiamṭhat ran an mamawh hle.

Mangṭha MPL
Mizorama football inelna sang berah Aizawl FC-in record an nei ṭha ber a, ṭum li ngawt an champion tawh. Amaherawhchu Mizo club hi a zawnin vawi thum an la champion ngai lo a, kumin hian a lungthu kim nan champion an tum hle.

League round-ah Aizawl FC hi MPL-ah a chung berah an awm a, champion tura rinkai ni mah se semifinal-ah FC Venghnuai an hneh lo. Mizo club hian I League leh MPL an khelh kawp avangin an vanduai phaha ngaitu an ṭhahnem a, a nihna chen pawh a awm.

Uluk lehzuala thlir erawh chuan Mizo club hian MPL Board duhsakna an dawng a, I League an khelh dan milin MPL fixtures pawh thlak danglam a ni hial. I League club ai mahin Mizoram Police-in MPL baka inelna dang hmachhawn tel an tuar a, coach Lalbiaksanga Colney hoten Sikkim Police Invitation Tournament an khelh avangin MPL semifinal an thleng zo lo.

Aizawl FC pawhin I League khelh an tuar ve tho a, Sudeva Delhi an hmachhawn tukah FC Venghnuai nen semfinal an khel a, an ṭhat dan berin semifinal first leg-ah an inlan thei lo. Chutihrualin AFC hian 3-1 a hma an hruai hnuah an insut zawhtir a, 3-3 in inkhel a tawp.

Second leg-ah erawh Aizawl FC hi kim ṭhapin an khel thei a, an kutah engkimah a awm. Amaherawhchu Aizawl FC hian kim ṭhapin FC Venghnuai an hneh lo a, fixtures chhuanlam theih a ni ta lo. I League club an vanduai a, FC Venghnuai fak mai loh chu tih theih dang a awm lo.

An vanduai zel
Aizawl FC hian MPL league round khel ṭha viau mah se I League lamah erawh bul an ṭan ṭha lo a, RG Stadium-a I League match thum an khelh aṭangin point li an hlawh chhuak. Heng inkhel pathumah hian Standly Rozario hote hi an khel ṭha a, an khelh dan thlir chuan point li aia tam hmuh an phu.

Coach tawnhriat nei ṭha Standly hi lung lam fel loh avangin a haw a, Mizo club hi coach Victor Lalbiakmawia leh Lalrozama Fanai te hnuaiah a awm. Mizo coach pahnih hnuaia Aizawl FC-in I League match an khelh hmasa berah an vanduai.

Aizawl FC hian khualmualah RoundGlass Punjab an hmachhawn a, 2-1 in an chak lo. Hun tawp hma hretin Mizo club-in penalty an hmu a, captain Lalchhawnkima'n keeper bum mah se crossbar a pet per.

Tawnhriat nei ṭha Kimkima hian MPL9-ah goal nga ngawt a khung a, heng zinga goal thum hi penalty a ni. Hei chauh hi a ni lo, Kimkima hian Inter Village Football-a Champhai Kanan a champion pui ṭum pawhin penalty a pet thiamzia a pholang tawh a, I League-a penalty aṭanga a khung loh hi vanduai vangah a ngaih theih.

Engtin zel?
Mizo club tan Mizo player-te an pawimawh ṭhin a, RoundGlass Punjab laka goal khungtu pawh R. Lalthanmawia niin a siamsaktu pawh R. Ramdinthara a ni. Chutihrualin I League chinah chuan player man to zawk foreigner-ten an theihna sang tak an pholan a pawimawh.

Aizawl FC-in beiseina sang tak nena an lakluh Henry Kisekka-a'n goal a la khung lo a, chance ṭha a hlah hnem ṭhin. Gokulam Kerala tana I League-a ropui taka khel tawh Kisekka chet ṭhat hi Mizo club tan a pawimawh.

AFC hian I League hnuhnung pahnihah Championship round an khel pha lo a, NorthEast aṭanga I League champion awmchhun club tan chuan result ṭha a ni lo. Tun season-ah Aizawl FC hian season ṭantirh aṭangin foreigner nen kim ṭhapin an khel a, Championship round an khelh pha lo a nih chuan season ṭha loah a ngaih theih ang.

I League-ah hian team 12 an awm a, vawi khat an inkhelh kual zawha a sang pasarihin Championship round hi an khel a, a hnuai lam pangain Relegation round an khel thung. Vawi li khelh zawhah Aizawl FC-in point li an hmu a, Mizo club hi pakuanaah awmin Relegation round khel thei zingah an awm mek a ni.