Argentina thiamna tak a lang ta!
Lionel Messi-a'n penalty a hlah zanah Argentina chuan Poland 2-0 in an hneh tho a, world champion vawi hnih ni tawh hian Qatar World Cup khelh laiah last 16 an inhlangkai.
Nilaini zan inkhel dangah Mexico chuan Saudi Arabia 2-1 in an hneh. Mexico leh Poland ten point li ve ve an nei, point hmuh zat inangah Robert Lewandowski chu goal difference nei ṭha zawk niin an tlang.
Argentina hian Inrinni zanah Australia an hmachhawn dawn, last 16 inkhel dangah champion lai France leh Poland te an inhmachhawn ve thung ang. Ground D aṭangin France leh Australia te hi an tlang ve bawk a ni.
Thutlukna fuh
Argentina coach Lionel Scaloni-a'n thutlukna huaisen a siam, an match hmasa bera che fuh lo tak Cristian Romero chu bul ṭan turin a ring ngam a, ani hi Copa America an champion ṭum leh qualifying lama rinrawl kha a ni.
Romero leh Nicolas Otamendi te inkawp an nghet ṭha em em a, striker ṭha bik Lewandowski an dahṭha hneh hle, an lamah goal hlauhawm a awm lo, keeper Emiliano Martinez-a'n hnathawh tur a nei meuh lo.
Brighton tana season duhawm hmangtu Alexis Mac Allister a ring ngam bawk. Tun season Premier League goal nga khung tawhtu hian Nahuel Molina siamsak a khung, keeper Wojciech Szczesny-a'n tun World Cup bika a chhuah hmasak ber a ni hial.
Lautaro Martínez aiah Julian Alvarez a thlang zawk a, Manchester City striker Alvarez hi a hmuhnawm - Poland tlarhnung tan a hnawk takzet a, a chet ranna hmangin defender a tibuai thei hle, a goal khung pawh mawi tak a ni.
Penalty hlah
Poland tan group hmahruaitu ni chunga tlang turin point khat hmuh belh a tawk a, goal khung tum vak ai chuan a venhim lam an ngaipawimawh kha a mak hran lo. Coach Czeslaw Michniewicz-a'n a naute chu tlarhnungah a remkhawm.
Goal ven thiam an ni a, an match hmasa pahnihah pawh goal an chhuah lo - Argentina lakah pawh an inveng rei thei hle. Alvarez-a shot ṭha tak chu Szczesny fakna a ni a, corner aṭanga Angel di Maria ball pet chu Juventus tana a khelhpui Szczesny bawkin a lo dang.
Minute 39-naah Szczesny hian ball kang an inchuhna lamah Messi-a hmai a khawih fuh; VAR hmanga ennawn a nih hnuah penalty an pe, mahse Messi-a'n na taka a pet meuh pawh Poland keeper hian a dansak tho.
Saudi Arabia an hneh ṭum pawhin Szczesny-a'n penalty a dang tawh, a tan World Cup ṭha tak a ni. Argentina lakah goal hnih chhuah mah se an tlang ta tho a, France an hmachhawn hunah pawh an innghahna a ni leh ngei ang.
Hmasawnna
World Cup ṭan hmain Argentina inkhel enna tur ticket hralh a kal takzet, an match hmasa berah erawh Saudi Arabia an ngam lo. Messi leh a ṭhiante hian Mexico lakah pawh goal khung an harsat hman a, mahse Barcelona captain hlui goal hmangin harsatna an su kiang.
Mexico an hneh ṭum khan La Albiceleste hian hma an sawn hret, duhthusam vek la ni lo mah se mamawh zat goal an khung thei bakah an tlarhnung a phui, ni hnih hnua match an khelh leh meuh chuan Poland lakah inkhel pumpui an thunun tluan chhuak zak.
Copa America leh World Cup hnuhnung lama Argentina ṭhat tawk lohna chu tlarhnung a ni ṭhin. Scaloni-a'n thuneihna a chan hnuah tlarhnung a ngai pawimawh. Copa America final-a Brazil meuh pawh Rio khawpuia an hneh theih chhan kha goal an venhim ṭhat vang a ni.
Argentina hi last 16-a Australia nen an inkhelh hunah rinkai zawk an ni dawn, chutihrualin Saudi Arabia laka chesual thei an ni tih hriat tel a ngai. An tlang zel a nih chuan quarterfinal-ah Netherlands leh USA inkhela chak zawk an hmachhawn leh ang.