Chak mah se Mexico an tla

Mexico an vanduai, an elpui Poland nen an point hmuh a inzat a, match thum aṭangin point li ve ve an hmu. Inkhel tawp hma minute 20 chhung vel phei kha chuan an inbuk tawk takzet, a hnuai zawk an nihna kha yellow card hmuh tlem zawk vang (fairplay) chauh a ni.

A tawpah erawh goal an chhuah zeuh a, goal difference hmangin Poland an phak lo. Saudi Arabia tan Salem Al Dawsari khan goal khung lo ni ta se, Poland leh Mexico te point leh goal difference a inzat, hemi a nih lai kha chuan fairplay en tur.

Argentina lamin goal khung belh ta se, khatihlaia 2-0 a hmahruai ve mek tho Mexico kha an la tling thei, anmahni lamin khung belh pawh ni se an tlang thei tho. Mahse, goal khung an tum luatah an tlarhnung pawp zeuh an tuar.

Hamrik hnuhnung a ri a, uiawm takin Mexico an tla. Inkhelh a zawh aṭanga darkar hnih hnu vel lekah Mexico coach Gerardo Martino chuan a hna a chawlhsan thu a sawi chhunzawm ve nghal.

Kum 60 mi Martino chuan, "He hna ka thawh tirh aṭang khan zalen leh vengtu nei lo ang maiin ka awm, nuam ti takin hna ka thawk. Ka hun hmante avang khan Mexican Football Federation leh president chungah lawmthu ka sawi," a ti.