Zanin aṭangin World Cup last 16 an khel dawn ; Champion nawn tum France

France-in FIFA World Cup second round-ah Poland an hmachhawn dawn a, December 4, Pathianni zan dar 8:30 hian Al Thumama Stadium-ah an inkhel ang. Les Bleus hi Kylian Mbappe telna a ni a, Poland hi Robert Lewandowski awmna a ni thung.

Ram pahnih hi an inkhelh hnuhnung berah an chak lo ve ve a, chutihrualin group match hnuhnung ber aṭangain an theihna hi teh a rem lo. Les Bleus coach Didier Deschamps chuan Tunisia an hmachhawn ṭumin inkhel bul ṭantu a thlak deuh hlawk a, Poland lakah erawh an ṭhat dan berin an khel leh tawh ang.

France hian tun ṭum inelnaa hian hliam vangin player ṭhahnem tak an chhawr thei lo a, chung zinga langsar chu Karim Benzema, Paul Pogba leh N'Golo Kante te an ni.

Qatar-ah France-in an team ṭha ber tir thei lo mah se champion thei tur team an tir tih hriat a ṭha. Les Bleus hian tlarhmaah Mbappe, Antoine Griezmann, Ousmane Dembélé leh Olivier Giroud te an nei a, an goal bawh a na hle.

Chutihrualin an tlarhnung erawh a phui lo, Deschamps-a hote hian clean sheet an la nei lo. Les Bleus khingpui tur Poland-ah hian Robert Lewandowski a awm a, Barcelona forward hian a theihna ang lantir lo mah se ven uluk a ṭul ang.

Poland hian match hnuhnung berah Argentina an hmachhawn a, draw chiah an mamawh avangin goal venhim hna an thawk a, tlarhnung player rem chungin an tlarhnung a pawp tho.

Chutihrualin France ang lo takin Poland hian Mexico leh Saudi Arabia lakah goal an chhuah lo a, Les Bleus lakah pawh hian goal venhim an la ngai pawimawh tho ang. Team pahnih hi hun pangngaiah an inhnehtawk a nih chuan Poland hian Lionel Messi penalty dangtu Wojciech Szczesny an kawl tih hriat a ṭha.