England khingpui tur African champion

Pathianni zan dar 12:30 hian England leh Senegal ten Al Bayt Stadium-ah FIFA World Cup second round an khel dawn. Senegal hi African champion an ni a, England hi Euro 2020 finalist an ni thung.

Three Lions hian Euro 2020 ṭha taka an khelh hnuah Nations League-ah an che ṭha lo a, mahse inelna lian zawk World Cup-ah team ṭha an ni tih an pholang.

Gareth Southgate-a hote hian Iran (6-2) sawpin bul an ṭan a, United States lakah goal khung lo mah se group match hnuhnung berah Wales 3-0 in an hneh.

Three Lions tan Marcus Rashford a che ṭha a, Manchester United forward hian goal thum a khung tawh. Team innghana erawh goal la khung lo Harry Kane a la ni reng.

England captain Kane hian goal la khung lo mah se ball a sem ṭha ṭhin a, team tan a ṭangkai hle. Chutihrualin Three Lions hi an squad a chhah em avangin Southgate tan thutlukna harsa siam a ngai dawn.

Tlarhnungah Jordan Pickford, Luke Shaw, Harry Maguire leh John Stones te chu khel tur chinagah a ngaih theih a, mual dinglama awm tur erawh a chiang lo - Kieran Trippier leh Kyle Walker te an awm.

Wales lakah Marcus Rashford leh Phil Foden te an che ṭha a, mahse Southgate-a'n match hmasa pahnihah Bukayo Saka leh Raheem Sterling te a ring zawk. Midfield-ah Declan Rice chu khawih chet thei lo a ni a, Jude Bellingham pawh a la inlan kim vek. Chutihrualin tlarhnung ti phui tur chuan Kalvin Phillips a pawimawh thei ang.

Southgate-a hote hian 1966 World Cup hnuah England-ah nomawi hawn an tum dawn a, an squad pawh a chhah ṭha. Amaherawhchu, an khingpui tur Senegal hi vanduai theihna an ni a, zawm ngawt chi an ni lo.

Aliou Cissé hnuaiah Senegal-in hma an sawn a, AFCON champion an nih bakah Sadio Mane tel loin knockout stage an lut. Bayern Munich forward Mane hi awm lo mah se Senegal hian English football hrechiang Ismaila Sarr, Kalidou Koulibaly leh Édouard Mendy te an kawl a, Southgate-a hote tan fimkhur a ṭul ang.

England tana chanchin lawmawm erawh Senegal hian hrem vangin Everton midfielder Idrissa Gueye an chhawr thei dawn lo a, Southgate-a hote erawh an kim. Tun ṭum hi team pahnih vawi khat inkhelhna tur a ni a, Three Lions hi a buk rit zawk an ni ang.