Millimeter khatin Germany an tling zo lo

FIFA World Cup vawi li champion tawh Germany-in Ningani zan khan Costa Rica 4-2 in hneh mah se second round luh nan a tawk lo. Inkhel dangah Japan-in Spain 2-1 in an barakhaih a, Hansi Flick-a hote an tla.

Football ram ropui tia sawi ṭhin Germany hi kum li liam ta khan Russia ramah South Korea hneh loin first round-ah an tla a, Qatar-ah Japan hneh loin an mualpho leh bawk. Germany lakah Asian ral a lian e.

Thil awm dan
Group match hnuhnung ber khelh hmain ram pali Spain, Japan, Costa Rica leh Germany-te chu tling thei vek an ni a; Khalifa International Stadium leh Al Bayt Stadium inkhelah pawimawh zawk a awm lo.

Germany tan inkhel dang result-a innghat lo turin goal ruk an khung a ngai a, mahse Costa Rica-in knockout stage luh beiseina an neih ve miau avangin goal ruk khung chu thil theih loh tluk a ni.

Hemi a nih avang hian Germany hian Spain puihna an mamawh. La Roja hian Japan laka point khat an hmuh chuan Flick-a hote tan goal hniha chak a ngai a, Luis Enrique hote hian hnehna an chang thei a nih chuan Germany tan chak hrim hrim a tawk.

Goal hlu bik
Germany-in Costa Rica lakah hnufual lai te nei bawk mah se hun a tawp meuh chuan 4-2 in hnehna an chang a, Spain kutah an innghat.

Mahse, 2010 World Cup champion Spain-in Japan lakah goal an khung hmasa chungin an goal neih an hum thei lo a, goal hnih dang an chhuah. Blue Samurai goal hnihna hian sawi zui a hlawh hle.

Minute 51-naah Kaoru Mitoma chuan ball-in line a pelh hma (?) chiahin a cross let a, Ao Tanaka chuan goal-ah a chantir. He goal hmang hian Japan-in second round an lut a, Germany erawh an tlak phah thung.

Millimeter khat chu
Football danah hian ball pumpuiin line a pelh chauhin 'out' tih a ni a, ball hnuain lamin line pel mah se a puar lamin line a khawih det hrim hrim chuan a out lo.

Mitoma-a'n ball a pet lai tak hian angle tam zawk aṭang chuan ball-in line a pel a ang hle. Ball hian line pel hman se chuan Spain-in goal kick an nei ang a, goal hi pawm a ni dawn lo.

VAR hmangin uluk takin ball awmna endik a ni a, chunglam aṭanga thlir chuan ball hian line a pel kim lo niin a lang. Ball leh line insi lai hi centimeter khat pawh a tlingin a lang lo a, chutihrualin millimeter pawhin pel lo se goal-ah pawm tho tur a ni.

Chutihrualin Spain coach Luis Enrique chuan official thutlukna hi a pawm lo. Enrique chuan, "Thlalak chu ka hmu ngei a, mahse khawih danglam niin ka hria. VAR khan thutlukna siam turin hun rei tak a hmang a, rinhlelh tur chu a awm. Thlalak darh hi thil thlen dan tak thlak a ni thei lo ang," tiin a pawm lo.

Mahse, match official-ten Japan lawmna turin thutlukna an siam a, Hajime Moriyasu hote hian an goal neih an hum zui avangin point thum hlu tak an hlawh chhuak. Champion ngei tuma Qatar pan Germany-in first round an paltlang thei lo a, second round an thlen lohna hi uar hreta sawi chuan 'millimeter khat' lek a ni.