Japan hneh loh vanga tla kan ni - Flick

Germany chuan FIFA World Cup group match hnuhnung berah Costa Rica 4-2 in hneh mah se goal difference-ah Spain an tluk loh avangin knockout stage lut loin puanthuah an tel.

Al Bayt Stadium-ah Germany-in bul an ṭan ṭha a, Costa Rica keeper Keylor Navas a rim nghal hle. Minute 10-na lekah Serge Gnabry-a'n goal hmahruai tauh lut mah se first half-ah goal dang an khung zui lo.

Halftime-ah hian inkhel dangah Spain-in Japan lakah 1-0 thoa hma an hruai avangin Germany hi second round lut thei dinhmunah an ding. Mahse, second half-ah thilmak a thleng.

Germany tlarhnung siamṭhat a ni lo a, minute 58-naah Yeltsin Tejeda-a'n Costa Rica tan siphurh a sut. Hei chauh hi a ni lo a, Japan-in Spain laka siphurh an sut hnuah an khung belh leh bawk. 2014 World Cup champion chu tla thei dinhmunah an ding.

Flick-a hoten nawr viau mah se goal an nei thei lo a, minute 70-naah Manuel Neuer-a'n an lamah a ti lut - Germany captain chauh ni loin tlarhnung player-ten mawh an phur. Germany chauh ni loin 2010 World Cup champion Spain chu tla thei dinhmunah an ding.

Germany an vannei ta a, substitute Kai Havertz chuan goal hnih a rawn khung. Spain laka goal pawimawh khungtu Niclas Fullkrug-a'n minute 89-naah a khung belh leh bawk. Germany-in 4-2 a hma an hruai tak avangin Spain kutah an innghat a, La Roja-in an si phurh an sut theih si loh avangin an tla.

Bayern Munich coach hlui Hansi Flick chuan, "Kan tlak chhan hi Costa Rica nena kan result vang a ni lo a, Japan nena a tawp lam minute 20 chhung kan khelh dan vang kha a ni. Tun inelnaah kan khel ṭha tawk lo a, ngai awh leh tur chuan hun kan duh ang," tiin inkhelh banah a sawi.

Germany hian Costa Rica lakah hian shot vawi 32 zet an ei a, goal zawna kal pawh vawi 11 a ni. Second round luh ngei tumin attacking football an khel a, mahse tlarhnung phui tawk loh leh finishing ṭhat tawk loh an tuar. Chutihrualin Flick-a thusawi hi a pawmawm hle - an tlak chhan chu Japan laka an tlawm vang a ni.