Spain leh Germany hneh thei Japan

FIFA World Cup 2022-ah Japan-in Germany an hneh hnuah Spain an hneh leh a, inelna pahniha Europe ram lian pahnih hi vanneihna a ni seng lo - an thiam.

Ningani zan inkhelah Japan hian Spain lakah 1-0 in hnufual mah se 2-1 in an lehthal. La Roja tan Alvaro Morata chuan minute 11-naah ṭha zetin a tauh goal a, Luis Enrique hoten inkhel an thunun bawk avangin Blue Samurai zin kawng a tawp dawn niin a lang.

Mahse, Japan coach Hajime Moriyasu-a'n halftime-ah a naute a fuih ṭha a, second half-ah team dang daih a ni. Germany laka goal pawimawh Ritsu Doan-a'n minute 48-naah siphurh sutna goal a khung a, Spain keeper Unai Simon-a'n a ti ṭha tawk lo.

Minute thum chhung lekin inkhel a danglam. Japan-in Ao Tanaka hmangin minute 51-naah hma an hruai a, goal luh dan hian sawi zui a hlawh. Ball-in line a pelh hman leh hman loah an inhnial a, chutihrualin goal lut tura Japan-in beiseina an neih lai hi hmuh hmaih a thiang lo.

Japan forward Daizen Maeda chuan vei lam aṭanga cross ball chu a tlawh hman lo a, mahse Maeda hnungah hian Kaoru Mitoma chuan timna nei miah loin ball out tur chu a tleng chungin a rawn pet hman. Goal khungtu Ao Tanaka ang thoin Mitoma hian fak a phu hle.

Blue Samurai hi halftime laiin ṭum hnih an hnufual a, an tho chhuak leh ve ve. World Cup inelna vawi khata hetiang ti thei Brazil (1938) leh West Germany (1970) huangah Japan an awm a, an lehthal team chu Germany leh Spain an ni.

Japan coach Hajime Moriyasu-a'n substitute awmze nei a siam a, Germany laka goal hnih an khungah bench aṭanga player lut vek an inrawlh. Spain laka a danglam lo - goal luhna tura pawimawh Doan leh Mitoma te hi bench aṭangin an lut.

Blue Samurai hian hma an hruai hnuah rang takin tlarhnung an ti phui lehnghal a, ball possession 18% lek chang chungin hnehna an chang. Japan hi hmahruaitu an nih avangin inelna hnuhnung ber finalist Croatia an hmachhawn a ngai dawn a, Spain erawh Morocco an hmachhawn dawn.

Luis Enrique hote hian Japan an hneh loh avangin second round-ah team nem zawka ngaih Morocco an hmachhawn theih phah a, chutihrualin chak lo lui erawh an ni lo. La Roja hian Japan an hneh loh avangin hun rei lote chhung chu tla thei dinhmunah an ding hial zawk a ni.