Lianzuala'n goal mawi a khung

Ningani zan khan Indian Super League-ah Mumbai City-in FC Goa 4-1 in an sawp a, Lunglei tlangval Lallianzuala Chhangte chuan Mumbai chak theih nan goal mawi bik a khung.

Mumbai Football Arena-ah mualneitu tan Jorge Pereyra Diaz-a'n minute 16-na lekah hmahruaina goal a khung a, Iker Guarrotxena hmangin Goa-in minute li hnuah an sut. Mizo tlangval Lianzuala theihna a rawn lang a, minute 43-naah Anwar Ali leh Aibanbha Dohling ten veng mah se Lianzuala hian petna tur khawp insiamin goal ṭha zet a khung.

Mumbai hian Lianzuala hmanga hma an hruai hnuah Jorge Pereyra Diaz-a'n goal hnihna a khung a, Alberto Noguera-a'n a khung belh leh bawk.

Vawiin hian ISL inkhel pahnih a awm dawn. Tlai dar 5:00-ah Chennaiyin leh Hyderabad an inkhel ang a, zan dar 7:00-ah Bengaluru leh ATK Mohun Bagan an khel leh ang. December 4, Pathianni zan dar 7:30-ah Jamshedpur leh Kerala Blasters te an inkhel leh bawk ang.