Belgium rualkhat ṭha bik an her liam ta

Hun rei tak chhung world number 1 an ni thei a, tunah pawh number 2 an la ni tho. Mahse, Belgium hian a player neih ṭhat leh ranking san ang huin nomawi a chawi thei lo, tunah pawh 'Rualkhat Ṭha bik' tia an sawite nen Qatar World Cup an mangṭha leh ta.

Belgium hian last 16 lut turin chak ngei ngei an mamawh a, mahse Croatia lakah goal an khung thei lo, 0-0 in an inhnehtawk. Red Devis hian an elpui ber an hneh thei tlat lo a, an hun ṭha khawhral zozai kha an ngaihtuah nawn apiangin an ui thar thei khawp ang.

Ningani zan Group F inkhel dangah Morocco chuan Canada 2-1 in an hneh thung. Morocco hian kum 36 hnua a vawi khat nan World Cup group stage an kalpel a, an ram tan chuan chanchin lawmawm leh hlu bik a ni.

A goal lo
Ahmad bin Ali Stadium-a inkhelah Belgium manager Roberto Martinez-a'n eng emaw tak danglamna thlen a tum, captain Eden Hazard chu inkhel bul ṭantu zingah a tel lo, striker Romelu Lukaku leh Canada laka goal khungtu Michy Batshuayi pawh bench-ah a ṭhu.

Kevin de Bruyne hoa khel Red Devils lamin ball chang tam mah se a hmawr an bawk thei lo, damkawr Lukaku luh hnuah an goal nawr an na zual a, mahse Inter Milan striker hi mamawh chhanna a ni bik lo.

Lukaku hi hliamin a tih buai reng a ni a, ṭha taka khel nghal tura beisei chi a ni hran lo. Mahse, hun tawp dawn hnaiah, six yard box aṭanga a hlah zet kha chu, ani ang tan chuan khung theih tur a ni, mahse a lut miau si lo - pawi an ti khawp ang.

World Cup hnuhnung bera finalist Croatia erawhin an mamawh ang tawk point an hmu a, an tum ang ngeiin group F aṭangin an tlang. Mahse an chak zawh bik loh avangin hmahruaitu erawh an ni thei bik lo, pahnihnaah an lungawi a ngai.

Mual an liam
Inkhelh banah Belgium player an ṭap a, insum harsa ti zual zingah Lukaku pawh a tel. Lukaku hi kum 29 mi a ni tawh a, World Cup an khelh leh meuh chuan a vanglai a liam tawhin a rinawm, chutiang bawkin a ṭhiante pawh an upa tawh dawn.

Roberto Martinez kaihhruaina hnuaiah Belgium hian kum ruk chhung hun an hmang tawh, kum 2018 September thla aṭanga kumin March thla thleng khan world number 1 dinhmun an luah thei hial, sawi nep a remchang lo mai thei.

Mahse, Kevin de Bruyne, Real Madrid forward Eden Hazard leh goalkeeper Thibaut Courtois bakah Inter Milan striker Lukaku nei chungin nomawi lian tham chawi an nei miah lo, nomawi chawi chu sawi loh inelna lianah final pawh an lut lo.

Croatia hmachhawn tu Belgium player-te kum chawhrual kha kum 31 leh ni 95 a tling a, kum 2010 hnu lamah World Cup match khata player lut kum chawhrual a tam ber ṭum a ni, a awmzia chu player tam zawk hi an upa tawh.

Belgium coach Martinez chuan, "Khelmual chhunga thil thleng chu eng pawh ni rawh se, heng kan player ṭhate hian naupang zawk tan thil ṭha tam tak an ti, entawn tur an hnutchhiah ringawt pawh hi a ropui," a ti.

Liam mai ang maw?
World Cup 2018 khan pathumna dinhmun an luah a, hei hi khawvel huap inelna liana an thlen san ber ṭum a ni. Russia rama inelna neih ṭum hian Brazil an hneh thei a, semifinal-a France an hneh loh ṭum pawhin corner-a goal khat an chhuah vang chauh a ni.

Kum 2014 leh 2016 European Championship-ah te khan quarterfinal an lo thleng tawh bawk, amaherawhchu an pi leh pute pawhin an lo tih theih ngai loh world champion nih meuh chu an tan a sang lua deuh a, an la ban phak lo.

De Bruyne leh Hazard te hi kum 31 mi an ni tawh a, defence laia ding Jan Vertonghen (35) leh Toby Alderweireld (33) te pawh an vanglai a liam tawh, anmahni in pawm harsa ti mah se 'kan upa tawh' tia KDB sawi kha an pawm a ngai.

Belgium team boruak chhung a ṭha lo tih media lamah a darh bawk a, tun aṭanga rei vak lo hnuah player ṭhenkhat chuan ram tana inkhelh an chawlhsan a nih pawhin a mak lo ang, chutih hunah chuan team thar din turin hma an la ang.

Insawifiahna
Belgium hian kuminah beisei an phak lo a ni satliah lo, group match pathum an khelhah goal khat chiah an khung a, goal an khung ṭum hian Canada 1-0 in hneh mah se, an vanneih vang chauha goal chhuah lo tia sawi theih an ni hial.

Player nge manager zawk dem tur tih zawhna chu kan chan dan a inang lo ang, manager Martinez chuan, "Group stage paltlang ngei kan duh a, kan duh ang bawkin team dang te pawhin an duh ve bawk.

"World Cup hnuhnung zawkah khan group match pathumah kan chak vek, khatiang nih leh pawh kha kan chak, mahse kan duh angin thil a kal vek thei bik lo, hei hi tournament nih phung chu a ni," tiin a sawi.

Spanish manager chuan sawi zawmin, "Match hmasa bera kan khelh danin sawisel a hlawh a, chumi hnuah mipui ngaihdan kan ngai pawimawh deuh pawh a ni mai thei," tiin a sawi.