US tana ven ngai Cody Gakpo

Netherlands leh USA te chuan zanin dar 8:30 hian World Cup last 16 match hmasa ber an khel dawn. Khalifa International Stadium-ah mipui an pungkhawm leh dawn a, khawvel hmun dangte pawhin Qatar lam a hawi ang.

Louis van Gaal-a naute hi group A hmahruaitu ni chunga tlang an ni, an khingpui tur USA hi group B pahnihna an ni thung a, an tluk loh awmchhun chu England chauh niin, point hnihin an inthlau.

Dutch team hian tun hma aṭangin player hmuhnawm leh langsar tak tak an lo nei tawh ṭhin, kuminah pawh Cody Gakpo a hmuhnawm hle. An ram player awm tawh zingah a zawna World Cup match thum goal khung thei palina a ni.

PSV forward Gakpo hian a ke ding leh vei bakah a lu hmangin tun World Cup-ah goal a khung tawh a, 6ft 4in a sang player hi ball kang leh leiah a hlauhawm tel hle tihna a ni.

Netherlands manager Van Gaal chuan, "Thil thlen chhoh dan tur chu ka hre vek lo. Mahse, ka hmuh dan chuan Cody hian mi bik ni turin theihna a nei, khawvela langsar berte zinga mi a ni thei ang.

"Player naupang tak la ni mah se club leh ram tan a rintlak," a ti a, defender Virgil Van Dijk pawhin Gakpo chu an team tana mi pawimawh a nih thu a sawi, zainah USA tlarhnung tan mangchhia thlentu nih a tum leh dawn.

US hian mi bik an nei ve tho, a hming chu Christian Pulisic a ni. Chelsea forward hian an match hmasa berah Iran an hnehna goal awmchhun a khung a, a hnuah erawh hliam tenau a tuar, nimin tlai thleng khan a dinhmun la chiang lo mah a inlan theih an beisei.

Kum 24 mi Pulisic hian ram tan match 55 aṭangin goal 22 a khung tawh a, a kum la tam vak lo mah se USA tan chuan tha a thawh hnem tawh hle. Zaninah a inlan thei a nih chuan, defender ṭha Van Dijk tan pawh hna a hautak ve ngei ang.