Argentina hmaah Australia

A bul kan ṭan chauh emaw tih laiin Qatar World Cup pawh last 16 khelh a hun dawn der mai. Zanin dar 12:30 hian Argentina leh Australia ten quarterfinal luh an inchuh dawn, inkhel a hmuhnawm ngei ngei ang.

Lionel Messi vangin Argentina hian ngaihven an hlawh zual a, world champion vawi hnih ni tawh hian a ṭum thum nan champion an tum dawn, an hma a ding tur Socceroos tan fimkhur a ngai dawn.

Argentina leh Australia te hian group match an khelh zawh aṭanga ni thum hnuah last 16 an khel leh nghal dawn tihna a ni a, hun awl an neih tlem avangin ram pahnih football hruaitute hian FIFA an sawisel a, fixture erawh tih danglam a remchang tawh si lo.

Australia hi rinkai lo zawk an ni dawn, chutih rualin Argentina hi Saudi Arabia laka chesual thei ve tho kha an ni. Knockout a ni tawh a, tumah chak chiang sa tia sawi theih a ni bik lo, eng pawh a thleng thei.

Socceroos assistant coach Graham Arnold chuan, "Zep tur a awm lo, kan palyer-te pawh hin Lionel Messi chanchin an ngaihven, mahse tun hunah chuan Messi ni loin Australia team tana khel kan ni tih kan hriat a ngai," a ti a, chak an tum tur thu a sawi bawk.

Messi hian Saudi Arabia lakah penalty a hlah, Mexico lakah erawh goal pawimawh a khung, an group match hnuhnung bera Poland an hneh ṭumin penalty a hlah thung, a kum tam deuh tawh mah se ven ngun ngai bik a la ni reng.

Argentina captain chauh a ni lo, rawlthar Julian Alvarez chu bul ṭan leh tura ngaih a ni. Manchester City forward hi a che rangin ball a thiam a, ani hi ngaihthah a thiang dawn lo - Australia pawhin hei hi an hrechiangin a rinawm.

Australia hian an match hmasa berah France an ngam lo, a hnuah erawh Tunisia leh Denmark lakah goal chhuah loin an chak thei. An tlarhnung phui hi an chakna thuruk a ni a, South American player ball thiam rual lakah inven an tum ngam ang.

Ram pahnih hi tun hmain vawi sarih an inhmachhawn tawh a, hengah hian Australia hi vawi khat chiah an la chak. An sulhnu en mai chuan an hna a hautak dawn, chutih rualin player leh coach thar an ni tawh hlawm a, last 16 lut thei an nih miau avangin an inringtawk ve dawn.

Qatar World Cup
Last 16 Fixtures (Hriat theih chin)
Zanin Inkhel Tur
Netherlands 08:30 PM USA
Argentina 12:30 AM Australia

December 4, Pathianni Zan
France 08:30 PM Poland
England 12:30 AM Senegal

December 5, Thawhṭanni
Japan 08:30 PM Croatia

December 6, Thawhlehni
Morocco 08:30 PM Spain
Note: Group match ṭhenkhat an la khel zo lo a, last 16 fixtures a la hriat vek theih loh a ni.