Arsenal tan Ozil a thiam tawk

Mesut Ozil chuan Arsenal tan player ṭha danglam bik a nih zia lantir nan Huddersfield lakah goal a khung bakah a ṭhiante khung tur vawi hnih a siamsak, kai thar team lakah 5-0 in hnehna a chanpui. Inkhel dangah Chelsea chuan Antonio Rudiger-a tauh luh hmangin Swansea City chu si khat faiin an hneh ve bawk.

Ozil-a show
Germany international Ozil-a'n dam lohna vangin Burnley FC a hmachhawn thei lo a, Huddersfield hmaah erawh dan theih loh a ni leh tawh. Arsenal tan striker manto ber Alexandre Lacazette-a'n goal hmahruai khungin Olivier Giroud goal hnih leh Alexis Sanchez-a'n nuamsa tak a khung bakah Ozil-a'n an goal a khung.

Arsenal manager Arsene Wen­ger chuan Ozil a dahsang hle, "Player ṭha bik a ni tih hi midangin min hrilh kher ngai loin kan hria. Khelmual chhunga a chetdan kha en ila, ball chan tumin a bei reng a, a ṭhian ten an mamawhna hmun apiangah a awm zel mai a ni," a ti.

Minute thumna lekah Laca­zette-a'n midfielder Aaron Ramsey ball pek a khung nghal a, mikhual lamin Steve Mounie hmangin chhan letna hun ṭha nei mah se goal keeper Petr Cech a paltlang zo lo; Gunners hian second half minute li chhung leka goal thum khungin Huddersfield beiseina an ti tawp.

Ozil leh Alexis Sanchez ten rang zeta an in one-two hnu­ah substitute Giroud-a'n yard rukna vel lek aṭangin a khung a, Chile international hian Ozil-a cross chu tawih zetin a volley lut; Ozil hian Huddersfield goalkeeper Jonas Lossl chauh a hmachawn tawh hnuah cool zetin a khung a, goal hnuhnung ber Giroud khung erawh wing back Sead Kolasinac thawhrah a ni thung.

Arsenal an tluang
Arsene Wenger-a naute hian Emirates Stadium-ah Premier League match 11 chhung hnehna an chang zawn tawh a, an chak loh hnuhnun ber chu April thla daih tawh kha a ni; an mualah hian tun season chhung bikin match sarih khel tawhin point 21 an hmu thei.

Season dangah chuan No­vember thla hi Gunners hun duhawm a ni ngai meuh lo, kuminah erawh league match li an khelhah vawi thum hnehna an chang thei, an chak loh chhun hi hmahruaitu Manchester City lakah chiah a ni; point 28 hmuin league table-ah palina an ni mek.

Arsenal hian kartawpah an chunga awm Manchester United an mikhual zui dawn a, inkhel pawimawhah hian striker Lacazette an chhawr thei dawn lo. France international hi Huddersfield nen an inhma­chhawn ṭum hian a malpui hliam vangin minute 45-naah lakchhuah a ni.

Gunners manager Wenger chuan, "Lacazette malpui a hliam a, kartawpah a inkhelh theih ka beisei lo," a ti. Lacazette awm lo mah se Giroud leh Danny Welbeck te an la awm avangin Wenger tan tlarhma a khel tur thlan kawngah buaina tur a awm lo ang.

Goal khat a tawk
Premier League champion lai Chelsea-in an mikhual Swansea City lakah inkhel thunun hle mah se goal khung turin an nghah rei a ngai, minute 55-naah Germany defender Antonio Rudiger chuan N'Golo Kante-a goal shot an tauh per chu hnai tak aṭangin a tauh lut, club tana a league goal hmasa ber a ni.

Stamford Bridge-a inkhelah hian Eden Hazard leh Danny Drink­­water te chu bench lamah hah­chawlhtir an ni a, Italian mana­­ger Antonio Conte-a'n a player ṭha a chawlhtir chhan hi December thlaah match an ngah lutuk dawn vang nia ngaih a ni.

Chelsea manager Conte hi Blues-in corner an hmuh ni ngei pek an nih loh chung­changah a chetmawi loh avang­in hnawhchhuah a ni a, second half lam chu a naute a ho thei lo. Conte hian inkhelh banah a chet dan mawi lo vang hian ngaihdam a dil. Pedro-a cross Swansea defender Alfie Mawson-a'n a khawih fuh ngei nia langah corner an pek loh vangin a thinrim a ni.

Kum 48 mi Conte chuan, "Ka thinur a, thil ka tihsual avangin ngaihdam ka dil. TV aṭanga inkhel en chu a hrehawm takzet, kan inbiak pawh theih loh avang khan a hrehawm zual a ni," tiin a sawi. Conte hian Premier League match bikah a naute vawi 52 a enkawlna chiah a ni.

League match 14 an khelh­ah Chelsea hian point 29 hmuin pathumna an ni mek a, hmahruaitu Manchester City an phak lohna chu point 11 zet a la ni. December thla chhung hian Newcastle (home), West Ham (away), Huddersfield (away), Southampton (home), Everton (away), Brighton (home) leh Stoke (home) te an hmachhawn dawn a, tun dinhmunah chuan an khingpui tur pasarih hi table chanve hnuailam ami vek an ni.