Aizawl FC ven dan kan zir ṭha - Police coach
Mizoram Premier League Season 6 semifinal match hnuhnung ber chu December 4, Thawhṭanni zan khian Lammualah khelh a ni dawn a, Mizoram Police leh Aizawl FC ten final luh an inchuh ang.
First leg-ah team pahnih hi 2-2 in an inhnehtawk a, minute 90 dang khelh tur a la awm.
Aizawl FC hian Police laka an goal hnih khung nan freekick leh corner kick an hmang ṭangkai a, Police defender-te'n an ven hneh loh feet 6 leh inches 2-a sang Masih Saighani vanga lut a ni.
Afghan defender Mashi hian goal khat a tauh luh bakah a ball tauh Police keeper Lalṭanpuia tihper chu Lalhriatrenga'n (Achi-a) a khung bawk.
Police coach Lalbiaksanga Colney chuan, "Training kan nei ṭha a, set piece aṭang chuan tih goal-tir kan tum tawh lo. Aizawl FC danglamna chu an foreigner te an ni a, amaherawhchu I League khela an zin chhuah avangin an dinhmun a ṭha bik lo. Chakna chance hi 50-50 ve ve kan nei a ni," tiin Vanglaini a hrilh.
Aizawl FC-in I League-a an match hmasa berah East Bengal chu Salt Lake Stadium-ah an draw thei a, hei hian phurna nasa tak a pe ang.
Portuguese coach Paulo Meneses chuan, "Salt Lake-a Aizawl FC ṭantute ang kha Lammualah pawh an awm theih ka beisei a, ṭantu kan neih ṭhat phawt chuan ṭha lehzualin kan khel thei ang," tiin entu mipui a ngai pawimawh thar hle.
AFC boss Paulo hian Kolkata aṭanga an haw hnuah training an la neih leh loh avangin player hliam te dinhmun a la hriat loh thu a sawi a, Police hmachhawn turin Romanian midfielder Andrei Inonescu a dam hman ang em tih chu zawhna chhan theih loh a la ni chhunzawm zel bawk.
Tun season-ah Aizawl FC hian Police goal-ah vawi riat ngawt an thun tawh a, vawi thum an inkhelh tawhah goal hnih an la khung tling ziah.
Hetihlai hian tun hnaiah Police FC hi team thar ang maiin an danglam tawh. Coach thar hnuaiah an che ṭha a ni mai lo a, Police pumpui an phur thar a, anhotute'n an ṭawiawm ṭhain a vawi khatna atana MPL champion nih tumin an ṭang hle a ni.
Hmuhnawm tur chu
Semi final first leg inkhel en tan he inkhel hi en nawn loh phal chi a ni lo. Aizawl FC Afghan defender Masih leh Police strike force Lalfakzuala leh F Lalrinpuia-te innawr vel chu hmuhnawm a tling.
Aizawl FC hian tun hnaia goal thun thei William Lalnunfela leh winger thatho Lalmuankima an kawl a, Police panna lai an tlar hnung an va nawr leh dawn a, en a chakawm.