Pardew-a'n chak a tum

West Brom manager thar Alan Pardew chuan attacking game khelh a tum thu a sawi a, player tin ten an theihna tawp an lanchhuahtir a beisei thu a sawi tel bawk.

Premier League club hian Tony Pulis an ban hnuah Nilaini zan khan Pardew hi an manager nghet atan an lalut a, kum 2019-20 season thleng inremna an siampui.

Pardew chuan tun sea­son chhunga West Brom-in goal an khung tlem chu a vei, league match 12 an khelhah goal kua chiah an khung thei a ni.

Kum 56 mi Pardew chuan, "A pawimawh hmasa ber chu hnehna chan a ni a, manager hma­sa Tony khan hna ṭha tak a thawk tih ka hria, ka kaihhruaina hnuaiah erawh player tin an zalen ang a, kan khingpuite goal bulah an hriam zawk ngei pawh ka beisei," tiin a sawi.

West Brom hian Tottenham an hma­chhawn ṭumin goal khat an neih hmasak hnuah an hum zo lo a, an match hnuhnung berah khan Newcastle lakah si hnih faiin hma hruai mah se an sut zawhtir leh vek, tun dinhmunah 16-na an ni mek. Pardew hian club lian tak enkawl a nih loh avangin chak reng theih a nih loh thu leh chak loh chang a awm a ṭul thu a sawi tel nghal bawk.