Zaninah FIFA World Cup draw nei dawn

2018 FIFA World Cup draw chu zanin dar 8:30 hian State Kremlin Palace, Moscow-ah neih a ni dawn. Football inelna ngaihhlut ber hi nakkum June 21 - July 15, 2018 hian Russia-ah khelh a ni ang.

Zanin draw-na hmun State Kremlin Palace hi concert hall a ni a, mipui 6,000 lenna a ni. Helai hmunah hian khawvel huapa lar ten show an lo nei tawh, chung zingah chuan Luciano Pavarotti, Placido Domingo, Julio Iglesias leh Elton John te pawh an tel.

England forward hlui Gary Lineker chuan final draw hi a kaihhruai dawn a, Linekar hian 1986 World Cup, Mexico-a neih a nih ṭum khan Golden Boot a dawng. Russian sports journalist Maria Komandnaya-i'n football pundit lar Lineker hi a pui ang a, football hrang hlui pariat Laurent Blanc (France), Gordon Banks (England), Cafu (Brazil), Fabio Cannavaro (Italy), Diego Forlan (Uruguay), Diego Maradona (Ar­gentina), Carles Puyol (Spain) leh Nikita Simon­yan (Russia) te hmel hmuh tur a awm bawk ang.

Europe-in team 14 an nei a, group awm zat pariat aiin an tam zawk. Hei vang hian Europe bik hi chu group khatah pakhat aiin an tam thei dawn a, khawlmualpui dang erawh group khatah an awm kawp thei lo thung ang.

World Cup khel turte
* Bracket a mi hi FIFA Ranking
Pot 1
Russia (65)
Germany (1)
Brazil (2)
Portugal (3)
Argentina (4)
Belgium (5)
Poland (6)
France (7)
Pot 2
Spain (8)
Peru (10)
Switzerland (11)
England (12)
Colombia (13)
Mexico (16)
Uruguay (17)
Croatia (18)
Pot 3
Denmark (19)
Iceland (21)
Costa Rica (22)
Sweden (25)
Tunisia (28)
Egypt (30)
Senegal (32)
Iran (34)
Pot 4
Serbia (38)
Nigeria (41)
Australia (43)
Japan (44)
Morocco (48)
Panama (49)
South Korea (62)
Saudi Arabia (63)