Indian Arrows an chak nghal

AIFF enkawlna hnuaia Indian rawlthar rual awm khawm Indian Ar­rows chuan theihna sang tak an nei a ni tih an pholang nghal a, Nilaini zan khan I League-a an match hmasa berah Chennai City chu 3-0 ngawtin an sawp.

Indian Arrows tan Mizo rawlthar duhawm Edmund Lalrindika chuan inkhel bul a ṭan a, Lalengmawia tan erawh squad-ah hmun a awm rih lo. Bambolim Stadium, Goa-a inkhelah hian Arrows tan FIFA U17 World Cup-a striker langsar Aniket Jadhav chuan goal hnih a khung a, Boris Singh chuan goal khat a thawh ve bawk.

Luis Matos enkawlna hnuaiah Edmund Lalrin­dika'n first XI chan a phu tih a khelh dan hmangin a pholang a, Indian Arrows hi India U17 leh U19 squad aṭanga player lakkhawm an ni chungin Edmund hi U19 aṭanga inkhel bul ṭan thei awmc hhun a ni.

Lunglei rawlthar Ed­­mund hian inkhel ṭan aṭanga minute 13-na lekah hun ṭha a nei nghal a, mawi zeta de­fender pahnih a bum hnuah amaha pet mai loin Suresh Singh tan siamsak mah se Suresh hian goal-ah a chantir thei lo.

Indian Arrows-in goal hmahruai an khung hnuah Edmund hian hun ṭha dang a neih chhunzawm a, mah se a pet out a, woodwork a pet per bawk - Edmund-a vanduai zan a ni a, goal a khung thei lo. Minute 58-naah erawh Aniket goal khung tur a siamsak tho a, Mizo tlangval a khel ṭha hle.