Copa del Rey A thiam 16 zingah Barcelona an tel
Barcelona-in Copa del Rey last 16 lut turin harsatna an tawk lo a, Nilaini zan khan an mikhual Real Murcia chu 5-0 ngawtin an sawp. Inkhel hmasa zawkah Barca-in 3-0 a hnehna an lo chan tawh bawk avangin an tlangna zat chu 8-0 a ni.
Copa del Rey-ah thawnthu ngaihnawm hriat turin a awm - third division club Formentera chuan rin loh takin Athletico Bilbao chu 2-1 in an barakhaih a, third division club dang Lleida Esportiu chuan Real Sociedad lakah comeback ropui an lantir bawk.
Messi tel lohna
Barcelona coach Ernesto Valverde-a'n first leg-ah 3-0 a hma an hruai tawh avangin a player langsar rual a chawlh hahdamtir a, Catalan club tana hmel lan tam lo player rual an inlan. Hetichung hian Real Murcia tan Barca an la ṭha lutuk hret a, goal thum phur sa tan Catalan club lakah thawh ngaihna awm lo.
Valverde naute hian minute 16-na aṭangin goal an khung ṭan a, Paco Alcacer chuan goal hmasa ber hi a khung. Barca-in goal dang erawh an khung lawk lo a, goal li dang khung turin second half an nghah thlen a ngai - Gerard Pique, Aleix Vidal, Denis Suarez leh substitute Jose Arnaiz ten goal khat ṭheuh an khung.
A hunah Formentera
Bilbao khelmualah mualneitu team hian hnehna an chan zawh loh ringtu an awm kher lo ang - third division club an mikhual miau avangin. Mahse, football mawina a lang chhuak a, chak tura rin loh zawk Formentera team-in hnehna an chang a, an mualah Athletic an hawihai.
Inkhel hmasa zawkah team pahnih hi goal khat ve ve khungin an lo inhnehtawk tawh a, minute 90 thleng an vawi hnih inkhelhnaah goal a lut lo - hetiang hian inkhel tawp se khualmuala goal nei Bilbao chu tlang tur an ni. Mahse, hun pek belh minute 96-naah Formentera tan Alvaro Muniz Cegarra chuan goal a khung a, La Liga club hnehin Spanish third division club-in last 16 an lut.
Mangṭha Sociedad
La Liga club zingah Bilbao chiah an mualpho lo a, goal hnih an khung hnua tawlhthlu Real Sociedad an mualpho chiang zawk - Sociedad hian Lleida nena an inkhel hmasa zawkah 1-0 in hnehna an chang a, an mualah Diego Llorente leh Juanmi hmanga 2-0 hmanga hma an hruai leh bawk avangin chak tur chiangah ngaih an ni.
Mahse, La Liga club khelmualah Spanish third division club an zam mai lo - minute 56-naah Aitor Nunez chuan an goal hmasa ber a khung a, penalty hmangin minute thum hnuah Manu Molina chuan a belh ve leh bawk. Lleida an phur tawlh tawlh a, hun tawp nan minute thum chauh a awm tawh tihah Bojan Samoukovic chuan an si phurh a sut zo! 3-3 in goal khung zat in ang mah se khualmuala goal khung hnem zawk Lleida an tlang.
Atletico an chak
Spanish club lian zingah Copa del Rey last 16 lut turin Atletico Madrid-in harsatna an tawk lo a, an mikhual Elche chu 3-0 a sawpin inkhel pahnih belhkhawmah 4-1 in hnehna an chang. Madrid khaw club tan hian Fernando Torres chuan a la chuai lo tih pholangin goal hnih a khung a, Jose Maria Gimenez chuan goal khat a thawh ve thung.
Sevilla chuan an mikhual Cartagena lakah ṭhat chhuah duh loin 4-0 ngawtin an lo sawp bawk a, inkhel pahnih belhkhawma an chakna zat chu 7-0 a ni. Sevilla tan hian Wissam Ben Yedder chuan goal hnih a khung a, Paulo Henrique Ganso leh Joaquin Correa te chuan goal khat ṭheuh an
khung bawk.
Copa del Rey Result
Sevilla 4 - 0 FC Cartagena
Barcelona 5 - 0 Real Murcia
Real Sociedad 2 - 3 Lleida Esportiu
Atlético Madrid 3 - 0 Elche
Athletic Club 0 - 1 Formentera
Las Palmas 2 - 3 Deportivo La Coruna