Serena leh Kuznetsova dinhmun chiang lo

Tennis season kal lai a zo tawh a, player tin ten season thar an thlir leh ṭan tawh. Nakkum January thla hian Grand Slam tournament hmasa ber atan Australian Open khelh a ni dawn a, Serena Williams leh world number 12 Svetlana Kuznetsova te chuan an inlan dawn leh dawn loh an la sawi chiang thei lo.

World number 1 hlui Serena hian nikum khan fa thla hnih mi pai chungin Australian Open nomawi hi a chawi thei a, fa a neih zui tak avangin season hmasa chawhnu lam aṭang khan a inkhel tawh lo. Kum 36 mi Serena hian a title humhim tura beih a tum thu sawi tawh mah se tun thlengin court chhunga a la inlan loh avangin a dinhmun hi a chiang lo a ni.

Serena-i coach Patrick Mouratoglou chuan, "Serena hi inkhel turin a inbuatsaih mek a, hun rei lote hnuah Florida-ah a training ka zawm ang. Tun dinhmunah chuan Australian Open atan thutlukna kan la siam lo, a hriselna leh taksa dinhmun ngaihtuahin a tana ṭha ber tur angin kan kalpui ang," tiin a sawi.

Russian nula Kuznetsova pawh tun thla tir lama a ban rek zai sak chu dam tawh mah se duhthusam a la ni lo deuh a, Grand Slam vawi hnih champion tawh Kuznetsova hian tun thla chhung tal chu indim taka awm rih a duh.

Kum 32 mi Kuznetsova chuan, "Ka banrek hmun hnihah a hliam a, hlawhtling taka zai a ni. Min enkawltu doctor chuan ka inkhelh theih hun tur tak a la sawi chiang thei lo a, hei vang hian Australia-ah ka inlan dawn em tih ka la chiang thei lo a ni," tiin a sawi.

Hard Court-a khelh ṭhin Australian Open hi nakkum Janaury 15-28 chhungin Melbourne Park-ah khelh a ni dawn a, mipa champion lai chu Roger Federer niin hmeichhe nomawi kawltu chu Serena Williams a ni thung.