Higuain-a'n a club hlui hmachhawn beisei

Juventus general manager Giuseppe Marotta chuan zanin dar 1:15-a Serie A hmahruaitu Napoli an hmachhawn hunah an striker chhuanvawr Gonzalo Higuain chu a inkhelh theih an beisei thu a sawi.

Argentina international Higuain hi a kut vei lam zai a ni a, Turin club-in an match hnuhnung bera Crotone si thum faia an hneh ṭum khan bench-ah ṭhut tluantir a ni tawh a, Juve manager Massimiliano Allegri chuan Higuain hian a club hlui Napoli a hmachhawn theih a beisei thu a lo sawi tawh.

Marotta chuan, "Higuain hi a dam chak hle a, San Paolo-ah a inkhelh theih ngei kan beisei. Napoli nena kan inkhelh tur hi a pawimawh hle a, kan inkar tih zimna hun ṭha a ni dawn, chutihrualin Serie A final ang maia sawi chi chu a la ni lo ang," a ti. Champion lai Juve hian Napoli hi point liin an phak lo mek.

Kum 29 mi Higuain hian Napoli tan 2013-2016 chhung khan a khel a, season hmasa khan Turin club hi zawmin Serie A nomawi a chawipui nghal. Tun season kal laiah league match 13 a khelh aṭangin goal riat a khung leh tawh, mahse an chungah hian Napoli awmin point liin an phak lo mek.