Maha Derby-ah Pune an chungnung

Nilaini zan Maharashtra Derby-ah Mumbai City aiin Pune an lian zawk a, Mizoram Premier League club Chanmari FC nena thawkdun Pune hian 2-1 in hnehna an chang.

Pune khawpuia inkhelah Mumbai City-in goal an khung hmasa zawk a, Mohun Bagan striker hlui Balwant Singh chuan minute 15-naah goal hmahruai a khung - Shree Shiv Chhatrapati Sports Complex-a Pune fans thawm a reh.

Mahse, chawlhlawk hman a nih hnuah Pune-in harh tharna an chang a, Uruguayan striker Emiliano Alfaro chuan minute 74-naah penalty hmangin an si phurh a sut a, minute 90-naah chakna goal a khung chhunzawm bawk.

Pune City tan Lalchhuanmawia Fanai leh Isaac Vanmalsawma ten inkhel bul an ṭan a, Chhuantea'n hun tawp thleng mualah hun a hman laiin Isaac hi minute 77-naah AS Roma midfielder hlui Jonatan Lucca chuan a thlak.

Zanin dar 8:00-ah inkhel pakhat a awm dawn a, Jamshedpur FC chuan Atletico de Kolkata an mikhual ang.

Mimal Lawmman
Swift moment of the match Emiliano Alfaro, Pune City
Winning pass of the match Diego Carlos, Pune City
Fittest player Lucian Goian, Mumbai City
Emerging player Kamaljit Singh, Pune City
Hero of the match Gerson Vieira, Mumbai City