Japan Vs Croatia; Brazil vs South Korea

FIFA World Cup second round chu zaninah khelh chhunzawm a ni dawn. Dar 8:30 hian Japan leh Croatia an inkhel dawn a, inkhel hnuhnung zawkah champion rinkai Brazil leh South Korea te an inkhel ang. Zanlai 12:30-a inkhel tur hi en châkawm zawk chu a ni a, Neymar a dam tawh avangin football mawina pholang ṭhin Brazil-in 'Samba Football' an khel thei ang.

Neymar a dam
Brazil-in group match hnuhnung berah Cameroon an hneh lo a, an chhe ta duai tihna a ni lo. Selecao coach Tite chuan Cameroon hmachhawn turin khelhna hmun chang tam lo 'B-Team' tia sawi theih a khelhtir a ni a, player thiam chungchuang Neymar a khel lo bawk.

Neymar hi match hmasa bera Serbia 2-0 a an hneh zawhah a inhliam avangin Switzerland leh Cameroon an hmachhawn ṭumin squad-ah a awm lo ve ve. Serbia laka goal hnih khungtu Richarlison pawhin a theihna anga khel chhuak turin Neymar hi a mamawh thu a sawi hial.

Brazil mipuiin Tlumtea tlirin Neymar hi an thlir ṭhup a, PSG forward chuan twitter-ah a training lai thlalak pholangin, "Ka dam ṭha a, inkhel turin ka inpeih," tiin a ziak tel bawk. South Korea tlarhnung tan hna a tam sawt ang.

Jesus a damlo
Brazil tan chanchin lawmawm loh a awm ve tho bawk. Arsenal forward Gabriel Jesus chu khup dinglam hliam vangin tun World Cup-ah a inlan thei dawn lo a, Tite mai bakah Premier League hmahruaitu Gunners tan chanchin hriat hreawm a ni ang.

Jesus bakah hian wing back Alex Telles a inhliam bawk a, South Korea an hmachhawn hunah Danilo leh Alex Sandro te an dam hman a pawimawh dawn. Tlarhma lamah erawh a êng zawnga thlir chuan Jesus a pawimawh pha lo a, Tite-a'n Arsenal forward ai hian Richarlison a dah sang zawk a, Spurs forward thlawp tur hian Vini Jr leh Raphinha te an awm.

Tlarhnungah Thiago Silva a la rintlak reng a, Brazil captain hi kum 38 ni tawh mah se tlarhnung ban rinawm a ni. Midfield-ah Casemiro a ṭangkai a, Manchester United midfielder hian Switzerland lakah goal awmchhun a khung.

Son leh a hote
Qatar-a World Cup opening-ah Korean singer Jungkook a che ṭha a, a hla sak 'Dreamers' chu World Cup hla ṭha zinga ngaih a ni. South Korea football team lamin World Cup-a result ṭha nei turin an 'dream' zui a, mumang ram chu a tak ramah an chantir chho mek.

Second round lut tur hian Son Heung-min-a'n a theihna tak a pholang ta a, yard 70 dawn lai a khalh hnuah fing taka ball pe lutin Hwang Hee-chan-a'n goal pawimawh bik a khung. South Korea-in Portugal 2-1 in an hneh a, Uruguay an tla.

Tunah erawh South Korea-in second round an luh vanga an hlimna an dah ṭhat a ṭul a, Brazil hmachhawn tura an inpeih a ngai. Tite hote tana harsatna siam turin Son an nei a, Ghana laka goal hnih tauh luttu Cho Gue-sung te an pawimawh dawn.

South Korea hian Cristiano Ronaldo telna Portugal meuh hneh mah se 2016 Euro champion erawh second round lut tawh an ni a, zanina an khelh tur Brazil nen khaikhin a rem lo. Son leh a hoten Brazil hmaah fiahna hautak zawk anhmachhawn ang.