Germany leh Spain hnehtu Japan

Japan-in tun ṭum World Cup-ah Germany leh Spain an hneh tawh a, Hajime Moriyasu hote hi 'giant killer' an ni. Zanin dar 8:30 hian Al Janoub Stadium-ah Croatia an hmachhawn dawn a, 2018 World Cup finalist tan Samurai Blue te hi zuam chi an ni lo ang.

Samurai Blue hian Germany leh Spain te hi an hneh satliah lo a, 1-0 a an hnufual hnuah an lehthal ve ve. Coach Moriyasu-a'n substitute awmze nei a siam ve ve a, khawvel huap pawha coach lar Hansi Flick leh Luis Enrique aiin player a siksawi ṭha zawk.

Japan hian Germany lakah 26% lek ball possession an nei a, Spain lakah phei chuan 17% chauh ball an chang. Heti chung hian chak phu khawpin Moriyasu hote hi an khel ṭha a, tlarhnung an rem phui thiam viau bawk.

Chutihrualin group E-ah Japan hi hmahruaitu ni hial mah se Croatia lakah rinkai zawk an la ni pha chuang lo. Luka Modric awmna team hi rinkai zawk an ni dawn a, chutihrualin group stage an khelh dan thlirin an intum tawk dawn tih a hriat theih.

Croatia hian Romelu Lukaku vanduai ṭum an tawng hlauh a, knockout stage an lut hram. Second round an luh takah chuan stage sang zawk thleng turin theihna an nei a, tlarhnung laia ding Josko Gvardiol hi Europe club lian ho en thlak mek a ni. Tlarhmaah striker hriam bik an nei lo a, chutihrualin Andrej Kramaric leh Ivan Perisic te awmna an ni tih hriat a ṭha.

Japan leh Croatia te hi 1998 World Cup-ah khan group khatah an awm ho a, Asian star Hidetoshi Nakata awm mah se Samurai Blue an chak lo. Croatia tan captain Davor Suker-a'n goal awmchhun a khung. Tun ṭumah erawh Japan hian star langsar bik an nei lo a, team angin an ṭha rual hle.

Last 16
Zanin Inkhel Tur
Japan 08:30 PM Croatia
Brazil 12:30 AM South Korea
December 6, Thawhlehni
Morocco 08:30 PM Spain
Portugal 12:30 AM Switzerland