Sir Thlanga'n min pui a ni - Chawnpui coach

Chawnpui FC coach Lalsangzuala Hmar chuan Honda MPL9 final an thlen nan Santosh Trophy-a Mizoram champion puitu coach H. Vanlalthlanga'n a puih nasat thu Vanglaini a hrilh.

Sanga hian Chanmari FC aṭangin coaching career hi a ṭan a, Thlanga hnuaiah assistant coach hna a thawk ṭhin. Thlanga hnuaiah hian Chanmari hian MPL bakah inelna hrang hrangah an champion a, Sanga hian thil tam tak a zir.

Chawnpui FC coach Sanga chuan, "Sir Thlanga hian Chawnpui match hi TV aṭangin a lo en ṭhin a, result kan neih ṭhat loh laiin min lo call ṭhin a, nasa takin min fuih ṭhin. Chawnpui FC-in final kan thlen theihna tur hian ka tan mi pawmawih lutuk a ni tlat.

"Rilru, taksa, game tactic leh thil dang tam takah hma ka sawn theih nan min pui ṭhin. Sir Thlanga hnuaia coaching hna ka lo thawh ve theite, a bula ka lo awm thei hi mi vannei tak ka ni a, ka theinghilh tawh lo tur a ni. Coach ka la ni ve tang tang thei hi Pathianin Sir Thlanga nena thawk duh tura hun ṭha min pek vang a ni," tiin Vanglaini a hrilh.

MPL9 ṭantirh khan Chawnpui hi champion rinkai an ni phak lo a, semifinal lut tura beiseiawm zingah pawh an tel lo. Amaherawhchu coach tawnhriat nei ṭha Sanga hoin semifinal an thleng hram a, a tunah chuan final hial an thleng a, nomawi chawi thei dinhmun an ding.

Sanga hian Thlanga nena MPL nomawi an chawi dun hnuah amaha kal hrangin Chanamri FC leh Chhinga Veng FC te nomawi a chawipui a, Electric Veng FC final a thlenpui bawk. Chawnpui FC hi a champion pui thei a nih chuan Sanga hi MPL-a club hrang pathum champion pui thei hmasa ber a ni ang.